ភ្នំពោន ក្នុងស្រុកដំណាក់ចង្អើរ កំពុងមានអ្នកសង់របងយកធ្វើជាកម្មសិទ្ធិ

របងបេតុងរាប់រយម៉ែត្រត្រូវបានគេធ្វើនៅលើភ្នំពោនចំនួន២កន្លែងផ្សេងៗគ្នា ដែលនៅក្នុងឃុំពងទឹក ស្រុកដំណាក់ចង្អើរខេត្តកែប។

ខណៈពេលកំពុងមានកម្មកឡើងទៅលើភ្នំធ្វើរបងបេតុងហ៊ុំពទ្ធ័ទន្ទ្រានយកដីនៅលើភ្នំពោនធ្វើជាកម្មសិទ្ធិនេះ ដោយមានប្រជាពលរដ្ឋម្នាក់មានលំនៅដ្ឋានជាប់ជើងភ្នំបាននិយាយប្រាប់អោយដឹងថា ដីព្រៃភ្នំពោនបានដាក់បញ្ចូលក្នុងសហគមន៍រួចអស់មកហើយ សូម្បីតែប្រជាពលរដ្ឋរស់នៅជើងភ្នំពោននេះឡើងទៅកាប់ឈើ ឬធ្វើអ្វីមួយក៏គេហៅទៅធ្វើការណែនាំកុំអោយនាំគ្នាទៅកាប់បំផ្លាញព្រៃឈើដែរ ហើយគ្រប់គ្រងជាចាំបាច់គឺមន្ត្រីរដ្ឋបាលព្រៃឈើខេត្តកែប។

ប្រជាពលរដ្ឋរូបនោះបាននិយាយរៀបរាប់ប្រាប់បន្តអោយដឹងថា បន្ទាប់ពីអ្នកមានអំណាចម្នាក់បានជួលប្រជាពលរដ្ឋអោយឡើងទៅលើភ្នំពោនប៉ែកខាងជើងកាប់បំផ្លាញព្រៃឈើរបស់សហគមន៍ដោយមិនឃើញមានទោសអ្វីមកខាងសហគមន៍ដែលមានប្រជាពលរដ្ឋជាអ្នកការពារអស់មានជំនឿក៏នាំគ្នាស្ងាត់ស្ងៀមមិនហានមាត់រហូតមកដល់សព្វថ្ងៃ។

ប្រជាពលរដ្ឋរូបនោះបាននិយាយថា ឥឡូវនេះគេធ្វើសំណង់រឹងមាំ និងធ្វើរបងបេតុងនៅលើភ្នំខ្វែងខ្វាត់ក៏មិនឃើញមានអាជ្ញាធរ និងមន្ត្រីជំនាញពាក់ព័ន្ធណាមកប្រកាសប្រាប់ប្រជាពលរដ្ឋដែរ។

លោក ឆាយ ឆៃ អភិបាលស្រុកដំណាក់ចង្អើរកាលពីរសៀលថ្ងៃទី២ ខែវិច្ចិកា ឆ្នាំ២០២២នេះ បាននិយាយប្រាប់តាមទូរសព្ទ័ថា លោកកំពុងតែជាប់រវល់ប្រជុំ ហើយបានបង្វែអោយអ្នការសែតទៅសួររដ្ឋបាលព្រៃឈើវិញទៅបានច្បាស់ជាង៕

អត្ថបទ៖ សឹង រ៉ាត់