កិច្ចប្រជុំ​ក្រុមប្រឹក្សាភិបាល​ប្រតិបត្តិ​នៃ​សមាគម​អន្តរ​ធនាគារ​ចិន​-​អាស៊ាន (“CAIBA”) លើក​ទី​១២ និង​កិច្ចប្រជុំ​យន្ដការ​សហប្រតិបត្តិកា​រ​អន្តរ​ធនាគារ​អាស៊ាន​បូក​៣ (“APTIBCM”)

ភ្នំពេញ ៖ ធនាគារ កាណាឌីយ៉ា និង​ធនាគារ​អភិវឌ្ឍន៍​ចិន បាន​ធ្វើជា​សហប្រធាន កិច្ចប្រជុំ​ក្រុមប្រឹក្សាភិបាល​ប្រតិបត្តិ នៃ​សមាគម​អន្តរ​ធនាគារ​ចិន​-​អាស៊ាន (“CAIBA”) លើក​ទី​១២ និង​កិច្ចប្រជុំ​យន្ដការ​សហប្រតិបត្តិកា​រ​អន្តរ​ធនាគារ​អាស៊ាន​បូក​៣ (“APTIBCM”) ឆ្នាំ​២០២២  ដែល​រៀបចំឡើង​រួមគ្នា ដោយផ្ទាល់ និង​អន​ឡាញ​  នា​ព្រឹក​ថ្ងៃទី​០៤ ខែវិច្ឆិកា ឆ្នាំ​២០២២ ។

កិច្ចប្រជុំ​នេះ​ក្រោម​នេះ​វត្តមាន លោករ័ត្ន សុវណ្ណ​នរៈ ឧបការី​ទេសាភិបាល និង​ជា​អគ្គនាយក​ត្រួតពិនិត្យ​ធនាគារជាតិ​នៃ​កម្ពុជា​, លោក តេង ស៊ី​ជុន ឯកអគ្គរដ្ឋទូត​វិសាមញ្ញ​និង​ពេញ​សមត្ថភាព​នៃ​សាធារណៈរដ្ឋ​ប្រជាមានិត​ចិន​ប្រចាំ​អាស៊ាន ព្រមទាំង ថ្នាក់ដឹកនាំ​និង​អ្នកឯកទេស​ធនាគារ​ជាង ៤០​នាក់ មកពី​ធនាគារ​សមាជិក និង​ធនាគារ​សង្កេតការណ៍រ​បស់ CAIBA និង APTIBCM​។

ថ្លែង​ទៅកាន់​អង្គប្រជុំ លោករ័ត្ន សុវណ្ណ​នរៈ បាន​អបអរសាទរ​ចំពោះ CAIBA និង​  APTIBCM សម្រាប់​ការចូលរួម​យ៉ាងសកម្ម​នៅ​ក្នុង​វិស័យ​ហិរញ្ញវត្ថុ​របស់​ប្រទេស​សមាជិក​រៀងៗ​ខ្លួន​។

លោក តេង ស៊ី​ជុន បានលើកឡើង​ពី​កិច្ចសហប្រតិបត្តិការ​ប្រកប​ដោយ​ផ្លែផ្កា​ដែល​ធ្វើឡើង​ដោយ​សមាគម​អន្តរ​ធនាគារ​ចិន​-​អាស៊ាន និង​យន្តការ​សហប្រតិបត្តិកា​រ​អន្តរ​ធនាគារ​អាស៊ាន​+៣ ដែល​បាន​គាំទ្រ​យ៉ាងខ្លាំង​ទៅលើ​ការ​ងើបឡើង​វិញ​របស់​សេដ្ឋកិច្ច និង​ការអភិវឌ្ឍ​ប្រកបដោយ​ចីរភាព​ក្នុង​តំបន់។

ជា​វឌ្ឍនភាព​ថ្មី​នៃ​កិច្ចសហប្រតិបត្តិការ និង​ស្របតាម​ទិសដៅ​ដែល​បាន​កំណត់ដោយ​កិច្ចប្រជុំ​កំពូល​អាស៊ាន​បូក​៣ លើក​ទី​២៤ ក៏ដូចជា​កិច្ចប្រជុំ​រដ្ឋមន្ដ្រី​ហិរញ្ញវត្ថុ​និង​ទេសាភិបាល​ធនាគារកណ្ដាល​នៃ​អាស៊ាន​បូក​៣ លើក​ទី​២៥,  ធនាគារ​សមាជិក​នៃ CAIBA និង APTIBCM បាន​ចុះហត្ថលេខា​លើ​សេចក្ដី​ថ្លែង​ការរួម​ស្តីពី​“​ការលើកកម្ពស់​កិច្ចសហប្រតិបត្តិការ​អភិវឌ្ឍ​ន៍​ប្រកបដោយ​ចីរភាព និង​ការផ្សារភ្ជាប់​ទំនាក់ទំនង​ហេដ្ឋារចនាសម្ព័ន្ធ​”​។

សេចក្ដី​ថ្លែង​ការណ៍​រួម បាន​ឆ្លុះបញ្ចាំង​ពី​ការប្ដេជ្ញាចិត្ត​របស់​ធនាគារ​សមាជិក ក្នុងការ​គាំទ្រ​កិច្ចខិតខំ​ប្រឹងប្រែង​រប​ស់​រដ្ឋាភិបាល និង​ធនាគារកណ្ដាល​របស់​ពួកគេ​រៀងៗ​ខ្លួន នៅក្នុង​ការស្ដារ​សេដ្ឋកិច្ច​ឡើងវិញ​ក្រោយ​ការរីក​រាលដាល​នៃ​ជំងឺ​រាតត្បាត​កូ​វីដ​-១៩,​បរិ​យាប​ន្ន​ហិរញ្ញវត្ថុ និង​ការអភិវឌ្ឍ​បៃតង​និង​ប្រកបដោយ​និរន្តរភាព​។

នៅ​ក្នុង​គោលដៅ​នេះដែរ ធនាគារ​សមាជិក​ក៏បាន​អះអាង​ពី​ការគាំទ្រ​ចំពោះ​សហគ្រាស និង​គម្រោង​នានា​ដែលមាន​វិសាលភាព​ថ្នាក់​តំបន់ តាមរយៈ​កិច្ចសហប្រតិបត្តិការ​ដូ​ច​ជា ឧបករណ៍​ផ្ដល់​ប្រាក់កម្ចី​រួមគ្នា មូលនិធិ​ផ្ដល់​ប្រាក់កម្ចី (​ពហុ​រូបិយប័ណ្ណ​) ការផ្ដល់​ប្រាក់កម្ចី​អន្ដរធ​នាគារ និង​ការ​រួមគ្នា​ផ្សេងទៀត​នៃ​ការវិនិយោគ និង​ការផ្ដល់​ប្រាក់កម្ចី​។

ក្រោម​ប្រធានបទ “​ការលើកកម្ពស់​កិច្ចសហប្រតិបត្តិការ​អភិវឌ្ឍ​ន៍​ប្រកបដោយ​និរន្តរភាព និង​ការតភ្ជាប់​ហេដ្ឋារចនាសម្ព័ន្ធ​”, ធនាគារ​សមាជិក ក៏ដូចជា​ធនាគារ​សង្កេត​ការណ៍​របស់ CAIBA និង APTIBCM បាន​ចូលរួម​ចែករំលែក និង​ផ្លាស់ប្ដូរ​ចំណេះដឹង និង​បទពិសោធន៍​ដ៏​មាន​អត្ថន័យ លើ​ប្រធានបទ​នានា រួមមាន (១) ការជំរុញ​ហិរញ្ញប្បទាន​ដែល​ផ្តោតលើ​បរិស្ថាន សង្គម និង​អភិបាលកិច្ច (ESG) ក្រោយ​សម័យកាល​រីក​រាលដាល​នៃ​ជំងឺ​កូ​វីដ​-១៩, (២) ការជំរុញ​សហប្រតិបត្តិការ​ហិរញ្ញវត្ថុ​ក្នុង​តំបន់ ដើម្បី​ពង្រឹង​ការតភ្ជាប់​ទំនាកទំនង​ហេដ្ឋារចនាសម្ព័ន្ធ​, (៣) ការជំរុញ​បរិ​យាប​ន្ន​ហិរញ្ញវត្ថុ ដើម្បី​ទ្រទ្រង់​សហគ្រាស​ខ្នាតតូច ក្នុង​សេដ្ឋកិច្ច​ក្រោយ​ការរីក​រាលដាល​នៃ​ជំងឺ​កូ​វីដ​-១៩ និង (៤) ការជំរុញ​សហប្រតិបត្តិការ​ហិរញ្ញវត្ថុ​ក្នុង​តំបន់ តាមរយៈ​នវានុវត្តន៍​ឌីជីថល​។​

នៅក្នុង​កិច្ចប្រជុំ​នេះ ធនាគារ​សមាជិក​ក៏បាន​គូស​បញ្ចាក់​ផងដែរ អំពី​សារៈសំខាន់​ក្នុងការ​ជំរុញ​កិច្ចសហប្រតិបត្តិការ​បន្ថែម​ទៀត ជាពិសេស​ក្នុង​បរិយាកាស​សេដ្ឋកិច្ច​ប្រកបដោយ​បញ្ហា​ប្រឈម​នាពេល​បច្ចុប្បន្ន​។

ជា​កិច្ចបញ្ចប់​នៃ​អង្គប្រជុំ ធនាគារ កាណាឌីយ៉ា បាន​ផ្ទេរ​តួនាទី​ជា​សហប្រធាន​ទៅឱ្យ ធនាគារ PT Bank Mandiri (Persero) TBK នៃ​សាធារណរដ្ឋ​ឥណ្ឌូនេស៊ី សម្រាប់​កិច្ចប្រជុំ​របស់ CAIBA និង APTIBCM ឆ្នាំ​២០២៣​។​

សមាគម​អន្តរ​ធនាគារ​ចិន​-​អាស៊ាន (CAIBA) ត្រូវបាន​បង្កើតឡើង​ផ្អែក​តាម​សំណើ​ដែល​ផ្តួចផ្តើមឡើង​ដោយ​សាធារណរដ្ឋ​ប្រជាមានិត​ចិន នៅក្នុង​កិច្ចប្រជុំ​រដ្ឋមន្ដ្រីការបរទេស​អាស៊ាន​-​ចិន នា​ថ្ងៃទី​២៩ ខែតុលា ឆ្នាំ​២០១០ នៅ​ទីក្រុង​ហាណូយ ។ សមាជិក​របស់ CAIBA រួមមាន ធនាគារ​ធំៗ​ចំនួន​១១ មកពី​ប្រទេស​សមាជិក​អាស៊ាន និង​ប្រទេស​ចិន មានដូចជា Bank Islam Brunei Darussalam (​ប្រ៊ុយណេ​) – ធនាគារ កាណាឌីយ៉ា (​កម្ពុជា​) – Bank Mandiri (​ឥណ្ឌូនេស៊ី​) – Lao Development Bank (​ឡាវ​) – CIMB Group (​ម៉ាឡេស៊ី​) – Bank for Foreign Trade of Myanmar (​ភូមា​) – Banco De Oro (​ហ្វីលីពីន​) – DBS (​សិង្ហ​បុរី​) – Kasikorn Bank (​ថៃ​) – BIDV (​វៀតណាម​) និង China Development Bank (​ចិន​) ។​

យន្ដការ​សហប្រតិបត្តិ​ការ​អន្តរ​ធនាគារ​អាស៊ាន​បូក​៣ (APTIBCM) ​ត្រូវ​បាន​បង្កើតឡើង​ផ្អែកលើ​អនុស្សរណៈ​នៃ​ការយោគយល់​គ្នា ដែល​បាន​ចុះហត្ថលេខា​ដោយ​ធនាគារ​សមាជិក​អាស៊ាន​ដែលមាន​ស្រាប់​ទាំង ១០ នៃ CAIBA និង​ធនាគារ​អភិវឌ្ឍន៍​ចិន (CDB) ធនាគារ​

​ជប៉ុន​សម្រាប់​សហប្រតិបត្តិ​ការ​អន្ដរជាតិ​(JBIC) និង​ធនាគារ​អភិវឌ្ឍន៍​កូរ៉េ (KDB) នៅឯ​កិច្ចប្រជុំ​ក្រុមប្រឹក្សាភិបាល​ប្រតិបត្តិ​របស់ CAIBA នាទី​ក្រុង​បាងកក ប្រទេស​ថៃ ក្នុង​ឆ្នាំ ២០១៩៕

ដោយ ៖ ​រ៉ា​វុ​ទ្ធ​