ផ្លូវមួយចំនួន​អាចនឹង​បិទបណ្ដោះអាសន្ន​អំឡុងពេល​ប្រជុំកំពូលអាស៊ាន

ផ្លូវមួយចំនួននៅក្នុងរាជធានីភ្នំពេញអាច​នឹងបិទបណ្ដោះអាសន្នអំឡុងពេលគណៈប្រតិភូជាតិ និង​អន្តរជាតិចូលរួមកិច្ចប្រជុំកំពូលអាស៊ាននៅកម្ពុជា ដើម្បីការពារសន្តិសុខ សុវត្ថិភាព​សណ្ដាប់​ធ្នាប់។

លោក ផុស សុវណ្ណ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានបានថ្លែងឲ្យដឹង នៅក្នុងវេទិកាស្ដីពីការត្រៀមយកព័ត៌មានជុំវិញកិច្ចប្រជុំកំពូលអាស៊ាននៅថ្ងៃទី ០៤ ខែវិច្ឆិកានេះថា អាជ្ញាធរ កម្លាំងសមត្ថកិច្ចអាចនឹងបិទផ្លូវ ឬស្ពានជ្រោយចង្វាជាបណ្ដោះអាសន្នដែលធ្វើឲ្យស្ទះ ប្រសិនបើបងប្អូនប្រជាពលរដ្ឋអ្នកដំណើរ​អាចចៀសបានគួរតែវាងទៅផ្លូវផ្សេងចៀសវាងការកកស្ទះ។

កងកម្លាំងចម្រុះប្រមាណជាង ១ម៉ឺននាក់បានត្រៀមសម្រាប់ការការពារសន្តិសុខនៅពេលកិច្ចប្រជុំកំពូលអាស៊ាននៅរាជធានីភ្នំពេញនាសប្ដាហ៍ក្រោយនេះ។

លោក សាន សុខសីហា អ្នកនាំពាក្យនគរបាលរាជធានីភ្នំពេញប្រាប់ថា «នៅពេលកិច្ចប្រជុំកំពូលអាស៊ាន គឺស្នងការដ្ឋាននគរបាលរាជធានីភ្នំពេញ បានត្រៀមកម្លាំងជាង ២ ៣០០នាក់ ដែលនឹងបែងចែកតាមគោលដៅសំខាន់ៗ ជាពិសេសនៅតាមដងផ្លូវដែលគណៈប្រតិភូធ្វើដំណើរឆ្លងកាត់»។

អ្នកនាំពាក្យដដែលរូបនេះបានបញ្ជាក់ថា កម្លាំងរបស់ស្នងការដ្ឋានគរបាលរាជធានីភ្នំពេញ នឹងទទួលខុសត្រូវជួយលើការសម្រួលចរាចរណ៍ការពារសន្តិសុខ សណ្តាប់ ធ្នាប់ និងសុវត្ថិភាពនៅតាមដងផ្លូវ។

កម្ពុជាធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធចាប់ពីថ្ងៃទី១០-១៣ ខែ វិច្ឆិកា ឆ្នាំ២០២២ ខាងមុខនេះនៅរាជធានីភ្នំពេញ។

កិច្ចប្រជុំកំពូលអាស៊ាននៅរាជធានីភ្នំពេញនឹងមានវត្តមានចូលរួមពីបណ្ដាមេដឹកនាំកំពូលៗនៅលើពិភពលោក ដូចជា៖ លោក ចូ បៃដិន ប្រធានាធិបតីអាមេរិក លោកនាយករដ្ឋមន្ត្រីកាណាដា លោកនាយករដ្ឋមន្ត្រីចិន និងលោកអគ្គលេខាធិការអង្គការសហប្រជាជាតិជាដើម៕

អត្ថបទ៖ ឡេង ដេត