ថ្ងៃឈប់សម្រាក! នៅផ្សារច្បារអំពៅសម្បូរតែអ្នកលក់ ខណៈអ្នកទិញមានតិចតួច

ទិដ្ឋភាពក្នុងផ្សារច្បារអំពៅ ក្នុងមូលដ្ឋានខណ្ឌច្បារអំពៅ រាជធានីភ្នំពេញ គេសង្កេតឃើញមានតែអ្នកលក់។ ចំណែកឯអ្នកទិញមានតិចបំផុត ព្រោះតែអ្នកធ្លាប់ចូលទិញ ពួកគាត់បានសម្រាកដើរលេងនាថ្ងៃឈប់សម្រាក នៅក្នុងឱកាសព្រះរាជពិធីបុណ្យអុំទូក។

តាមការរៀបរាប់ពីអ្នកស្រី ចាន់ ជឿន ជាអាជីវករលក់គ្រឿងទេស ក្នុងផ្សារបន្លែច្បារអំពៅ បាននិយាយថា នៅព្រឹកថ្ងៃទី ៧ ខែវិច្ឆិកានេះ នៅក្នុងផ្សារបន្លែសម្បូរតែអ្នកលក់ ហើយបើដឹងថាស្ងាត់ចឹង អ្នកស្រីមិនមកលក់ទេ។ មិនចំពោះតែអាជីវករលក់ដូរ នៅផ្សារច្បារអំពៅដែលស្ងាត់អ្នកទិញ សូម្បីតែផ្សារដទៃទៀត ក៏ស្ងាត់ដែរដោយសម្បូរតែអ្នកលក់ដែរ ព្រោះអ្នកទិញភាគច្រើន បា​នចេញទៅដើរលេងនៅតាមបណ្ដាខេត្តនានា។  

លោក សាន់ ប៊ុនណា ប្រធានគណៈកម្មការផ្សារបន្លែច្បារអំពៅ បាននិយាយថា មូលហេតុស្ងាត់អ្នកមកទិញ គឺភាគច្រើនអ្នកទិញបានធ្វើដំណើរទៅតាមបណ្តាខេត្ត ព្រោះជាថ្ងៃបុណ្យជាតិដែលត្រូវឈប់សម្រាក។

លោកថា ខុសប្លែកពីថ្ងៃទី ៥ ខែវិច្ឆិកាកន្លងទៅ គឺសម្បូរទៅដោយអ្នកទិញ មកទិញម្ហូបអាហារ និងគ្រឿងទេសយកទៅផ្ទះ សម្រាប់ធ្វើម្ហូបក្រៀមៗយកទៅទទួលទាន ពេលធ្វើដំណើដើរលេងតាមបណ្តាខេត្ត។ ផ្សារភាគច្រើន គឺតែងស្ងប់ស្ងាត់អ្នកមកទិញ ខុសប្លែកថ្ងៃបុណ្យចូលឆ្នាំខ្មែរ និងចិន សម្បូរអ្នកមកទិញ តែខ្វះអ្នកលក់ទៅវិញ ព្រោះអ្នកលក់ទៅដើរលេងតាមស្រុកកំណើតអស់៕

អត្ថបទ៖ នរា