រសៀលថ្ងៃទី ១០ វិច្ឆិកានេះ សម្ដេចតេជោ ហ៊ុន សែន នឹងចូលរួមកិច្ចប្រជុំរវាងថ្នាក់ដឹកនាំអាស៊ាន និងអាយប៉ា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ាន ឆ្នាំ ២០២២ នឹងអញ្ជើញចូលរួមកិច្ចប្រជុំទល់មុខគ្នារវាងថ្នាក់ដឹកនាំអាស៊ាន និងអន្តរសភាអាស៊ាន (អាយប៉ា) នៅរសៀលថ្ងៃទី ១០ ខែវិច្ឆិកា ឆ្នាំ ២០២២នេះ។

បើតាមសេចក្ដីប្រកាសព័ត៌មានរបស់រដ្ឋសភាកម្ពុជា បានឲ្យដឹងថា សម្តេច ហេង សំរិន ប្រធានរដ្ឋសភាជាតិកម្ពុជា និងជាប្រធានប្ដូរវេនអន្តរសភាអាស៊ាន (អាយប៉ា) នឹងដឹកនាំគណៈប្រតិភូជាន់ខ្ពស់សភា នៃបណ្តាប្រទេសជាសមាជិកអាយប៉ា អញ្ជើញចូលរួមកិច្ចប្រជុំទល់មុខគ្នា ដោយផ្ទាល់ជាមួយថ្នាក់ដឹកនាំអាស៊ាន នៅក្នុងកិច្ចប្រជុំកំពូលអាស៊ានលើកទី ៤០ និងលើកទី ៤១ នៅសណ្ឋាគារសុខាភ្នំពេញ។

នៅក្នុងកិច្ចប្រជុំដ៏សំខាន់មួយនេះ គណៈប្រតិភូសភា នៃបណ្តាប្រទេសជាសមាជិកអាយប៉ា នឹងលើកឡើងនូវធាតុចូល ដែលជាទស្សនៈរួមក្នុងនាមប្រទេសជាសមាជិកអាយប៉ា សម្រាប់ដាក់បញ្ចូលទៅក្នុងសារ ដែលនឹងត្រូវថ្លែងដោយសម្តេច ហេង សំរិន ប្រធានរដ្ឋសភា និងជាប្រធានប្តូរវេនអាយប៉ា លើកទី ៤៣ នៅចំពោះមុខថ្នាក់ដឹកនាំអាស៊ាន។

គួរជម្រាបថា កិច្ចប្រជុំទល់មុខគ្នារវាងអាស៊ាន និងអន្តរសភាអាស៊ាន ហៅកាត់ថា អាយប៉ា បានរៀបចំឡើងនៅរាល់កិច្ចប្រជុំកំពូលអាស៊ាន ដែលជាជំនួបផ្លូវការកម្រិតខ្ពស់បំផុតរបស់អាស៊ាន និងអាយប៉ា ដើម្បីពង្រឹង និងពង្រីកកិច្ចសហប្រតិបត្តិការរវាងស្ថាប័នទាំងពីរ និងដើម្បីពិភាក្សាស៊ីជម្រៅលើកិច្ចការរបស់អាស៊ាននៅគ្រប់កម្រិត។ ជំនួបរវាងប្រមុខដឹកនាំអាស៊ាន និងអាយប៉ា នឹងឆ្ពោះទៅរកគោលបំណងរួមរបស់អាស៊ាន គឺសនិ្តភាព ស្ថិរភាព និងគោលដៅអភិវឌ្ឍន៍ប្រកបដោយចីរភាព ក៏ដូចជាការពន្លឿន និងជម្រុញឲ្យសម្រេចបាននូវសហគមន៍អាស៊ានមួយ នាពេលអនាគត៕

ដោយ៖ ធឿន វ៉ាន់សុង