នាយករដ្ឋមន្ត្រីចិន អញ្ជើញប្រគល់ជំនួយទៅលើគម្រោងជួសជុល​ និងអភិរក្សប្រាសាទតាកែវ​ នៃរមនីយ​ដ្ឋានប្រវត្តិសាស្ត្រអង្គ​រ

លោក​ ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រី​​ក្រសួង​រៀបចំ​ដែនដី នគរូបនីយកម្ម​ និង​សំណង់​ តំណាងដ៏ខ្ពង់ខ្ពស់​សម្តេចតេជោ​ ហ៊ុន​ សែន​ និង​នាយករដ្ឋមន្ត្រី លី ខឺឈាង (Li Keqiang) នាយករដ្ឋមន្រ្តីចិន នៅព្រឹកថ្ងៃទី ១០​ ខែវិច្ឆិកានេះ​ បានអញ្ជើញជាអធិបតីក្នុងពិធីប្រគល់-ទទួលជំនួយរដ្ឋាភិបាលចិន អំពីគម្រោងជួសជុល​ និងអភិរក្សប្រាសាទតាកែវ​ នៃរមនីយដ្ឋានប្រវត្តិសាស្ត្រអង្គ​រ​ ខេត្តសៀមរាប។

នៅក្នុងឱកាសនោះ លោក​ ជា សុផារ៉ា មានប្រសាសន៍ថា វត្តមានរបស់នាយករដ្ឋមន្ត្រីចិន នាពេលនេះ គឺជាការបញ្ជាក់ជាថ្មីម្ដងទៀត អំពីកិច្ចសហប្រតិបត្តិការមិត្តភាពទ្វេភាគីកម្ពុជា-ចិន ជាប្រពៃណី និងជាយូរលង់ណាស់មកហើយ ដោយគិតចាប់ពីតាំងពីសម្ដេចព្រះ នរោត្តម សីហនុ ព្រះបរមរតនកោដ្ឋ ដែល​បានផ្សារភ្ជាប់ទំនាក់ទំនងការទូតជាផ្លូវការ រវាងប្រទេសទាំងពីរ នៅឆ្នាំ ១៩៥៨។

ក្នុងសា្មរតីបន្តមរតកនៃទំនាក់ទំនងដ៏ល្អិតរមួតនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងថ្នាក់ដឹកនាំចិន បានរួមគ្នាប្រឹងប្រែងអស់ពីសមត្ថភាព ពង្រឹង និងពង្រីកចំណងមិត្តភាព និងកិច្ចសហប្រតិបត្តិការទ្វេភាគីនេះ រហូតបានដំឡើងទៅជា «កិច្ចសហប្រតិបត្តិការភាពជាដៃគូយុទ្ធសាស្រ្ដគ្រប់ជ្រុងជ្រោយ» តាំងពីឆ្នាំ ២០១០ ហើយលោកនាយករដ្ឋមន្ត្រី លី ខឺឈាង ផ្ទាល់ គឺជាតួអង្គដ៏សំខាន់មួយរូប នៅក្នុងការសម្រេចគោលបំណងដ៏ពិសិដ្ឋនេះ​ ចាប់តាំងពីឆ្នាំ ២០១៣ មក៕