សម្តេចតេជោ ហ៊ុន សែន និងមេដឹកនាំអាស៊ានផ្សេងទៀត ជួបប្រជុំជាមួយតំណាងយុវជនអាស៊ាន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ រួមទាំងបណ្តាមេដឹកនាំអាស៊ានដទៃទៀត នៅរសៀលថ្ងៃទី ១០ ខែវិច្ឆិកានេះ បានអញ្ជើញជួបប្រជុំជាមួយតំណាងយុវជនអាស៊ាន។

ទំព័រហ្វេសប៊ុករបស់សម្ដេចតេជោ ហ៊ុន សែន បានលើកឡើងថា យុវជនត្រូវបានចាត់ទុកថា ជាកម្លាំងចលករដ៏សំខាន់ សម្រាប់ជំរុញកំណើនសេដ្ឋកិច្ច និងជាកម្លាំងផលិតកម្មដ៏មានសក្តានុពល។ យុវជនក្នុងតំបន់អាស៊ានអាយុចន្លោះពី ១៥ ទៅ ៣៤ឆ្នាំ មានចំនួនប្រមាណ ២១៣លាននាក់ ហើយមានការរំពឹងថា ចំនួនយុវជនអាចកើនដល់ ២២០លាននាក់ នៅឆ្នាំ ២០៣៨។

អាស៊ាន បាននិងកំពុងយកចិត្តទុកដាក់ខ្ពស់ ក្នុងការលើកកម្ពស់សមត្ថភាពរបស់យុវជន តាមរយៈការដាក់ចេញនូវគោលនយោបាយនានាគាំទ្រដល់ការអប់រំ និងផ្តល់បណ្តុះបណ្តាលជំនាញផ្សេងៗ ជាពិសេសការអប់រំផ្នែកឌីជីថល ដើម្បីឲ្យសង្គមមានការអភិវឌ្ឍរីកចម្រើន៕