សម្ដេចតេជោ ហ៊ុន សែន មិនមានបំណងធ្វើជាប្រធានអាស៊ានលើកទី ៤នោះទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសថា សម្ដេចមិនមានបំណងធ្វើជាប្រធានអាស៊ានលើកទី ៤នោះទេ បន្ទាប់ពីបិទបញ្ចប់ការធ្វើជាប្រធានអាស៊ានលើកទី ៣ បានទទួលជោគជ័យនាឆ្នាំ ២០២២នេះ។

សម្តេចតេជោ ហ៊ុន សែន បានថ្លែងក្នុងអញ្ជើញធ្វើសន្និសីទសារព័ត៌មាន ស្ដីពី លទ្ធផលនៃកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ នៅល្ងាចថ្ងៃទី ១៣ ខែវិច្ឆិកានេះថា សម្ដេច មិនមានបំណងធ្វើជាប្រធានអាស៊ានលើកទី ៤នោះទេ ខណៈដែលការធ្វើជាប្រធានអាស៊ាន មិនមែនជាការងាយស្រួលនោះឡើយ។

សម្ដេតេជោ ហ៊ុន សែន បានថ្លែងយ៉ាងដូច្នេះថា «ខ្ញុំអាចនឹងប្រកាសថា ខ្ញុំមិនឈានឆ្ពោះទៅរកការធ្វើជាប្រធានអាស៊ានលើកទី ៤ទេ ព្រោះវាល្មមដល់អាស៊ានលើកទី ៤ ខ្ញុំត្រូវអាយុ ៨០ហើយ ដូច្នេះវាល្មមគ្រប់គ្រាន់ហើយ ៣ដងនេះ ដូចអ្នកទាំងអស់គ្នាបានដឹងថា ធ្វើប្រធានអាស៊ានវាមិនមែនជាការងាយស្រួល»។

សូមជម្រាបថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្វើជាប្រធានអាស៊ានចំនួន ៣លើករួចមកហើយ គឺនៅឆ្នាំ ២០០២, ឆ្នាំ ២០១២, និងនៅឆ្នាំ ២០២២នេះ៕

អត្ថបទ៖ ឃួន សុភ័ក្រ