សម្ដេចតេជោ ហ៊ុន សែន៖ អាស៊ានមិនមែនជាកូនជឹងមហាអំណាចណាមួយនោះទេ

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍ថា ​អាស៊ាន​មិនមែនជាកូនជឹងរបស់ប្រទេសណាមួយនោះទេ ខណៈដែលថ្នាក់ដឹកនាំអាស៊ានបានសម្រេចបញ្ចូលប្រទេស​អ៊ុយក្រែនក្នុងសន្ធិសញ្ញាមិត្តភាព និងជាដៃគូសហការ (TAC) មិនបារម្ភពីការខឹងសម្បាររបស់រុស្ស៊ី ដែលកំពុងមានជម្លោះជាមួយប្រទេសអ៊ុយក្រែន។

សម្ដេចតេជោ ហ៊ុន មានប្រសាសន៍នៅក្នុងសន្និសីទសារព័ត៌មាននៅល្ងាចថ្ងៃទី ១៣ ខែវិច្ឆិកា នៅវិមានសន្តិភាពថា “​អាស៊ាន​មិនខ្វល់ថា នរណា​ខឹងនរណាទេ​យើងទទួលយកស្មើៗគ្នា​យើងស្ថិតនៅជាភាពកណ្ដាល​ដូច្នេះ យើងទទួលយកអ៊ុយក្រែនយើងមិនមែនធ្វើអាស៊ាន​គ្រាន់តែដើម្បីបម្រើ​រុស្ស៊ី ឬធ្វើអាស៊ានប្រើអ៊ុយក្រែននោះទេ”។

សម្ដេចតេជោ ហ៊ុន សែនបញ្ជាក់ថា សមាគមអាស៊ាន​បង្កើតឡើង​ដើម្បីទាក់ទងជាមួយដៃគូទាំងអស់​ដែលចង់ធ្វើទំនាក់ទំនងជាមួយយើង។ ហើយសម្ដេចគិតថា រុស្ស៊ីក៏គ្មានហេតុផលណាជំទាស់​រឿងដែលអាស៊ានទទួលយកអ៊ុយក្រែនក្នុងសន្ធិសញ្ញា TAC នោះដែរ៕

អត្ថបទ៖ ឡេង ដេត