សម្ដេចតេជោ ហ៊ុន សែន ៖ ប្រធានាធិបតីអាមេរិក លោក Joe Biden ទទួលទានម្ហូបខ្មែរ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២នេះ បានបង្ហើបឲ្យដឹងថា លោក Joe Biden ប្រធានាធិបតីសហរដ្ឋអាមេរិក បានទទួលទានម្ហូបខ្មែរ អំឡុងពេលលោកមកចូលរួមកិច្ចប្រជុំកំពូលអាស៊ាន-អាមេរិក និងកិច្ចប្រជុំកំពូលអាស៊ីបូព៌ា នៅរាជធានីភ្នំពេញ នៃប្រទេសកម្ពុជា។

សម្តេចតេជោ ហ៊ុន សែន បានថ្លែងក្នុងអញ្ជើញធ្វើសន្និសីទសារព័ត៌មាន ស្ដីពី លទ្ធផលនៃកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ នៅល្ងាចថ្ងៃទី ១៣ ខែវិច្ឆិកានេះថា នៅក្នុងពិធីលៀងសាយភោជន៍ កាលពីយប់ថ្ងៃទី ១២ ខែវិច្ឆិកា ប្រធានាធិបតីសហរដ្ឋអាមេរិក លោក Joe Biden បានទទួលទានម្ហូបខ្មែរ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «ចឹងទេ គេថា អាមេរិកមិនត្រូវការកម្ពុជា ប៉ុន្តែប្រធានាធិបតីអាមេរិក មកប្រជុំជាមួយនឹងការសម្រាកយ៉ាងស្រួល នៅក្នុងទឹកដីកម្ពុជា ហើយខ្ញុំឃើញប្រធានាធិបតី Joe Biden គាត់ទទួល ទានម្ហូបខ្មែរណា ខ្ញុំអង្គុយជាប់ជាមួយគាត់ហ្នឹង គាត់ទទួលទានម្ហូបខ្មែរ»៕

អត្ថបទ៖ ឃួន សុភ័ក្រ​