មេដឹកនាំអាស៊ាន និងមេដឹកនាំប្រទេសមួយចំនួនទៀត នឹងចាកចេញពីប្រទេសកម្ពុជានៅថ្ងៃនេះ

បន្ទាប់ពីកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ បានបញ្ចប់កាលពីថ្ងៃទី ១៣ ខែវិច្ឆិកា ឆ្នាំ ២០២២មក ប្រមុខរដ្ឋ-ប្រមុខរដ្ឋាភិបាលអាស៊ាន និងមេដឹកនាំប្រទេសមួយចំនួនទៀត បានធ្វើដំណើរចាកចេញពីប្រទេសកម្ពុជាជាបន្តបន្ទាប់ ក្រោយពីបានចូលរួមប្រជុំប្រកបដោយជោគ​ជ័យរួចមក។

សម្រាប់ថ្ងៃទី ១៤ ខែវិច្ឆិកានេះ បើតាមប្រភពព័ត៌មាន បានឲ្យដឹងថា លោកស្រី Jacinda Ardern នាយករដ្ឋមន្ត្រីនូវែលសេឡង់, លោក Justin Trudeau នាយករដ្ឋមន្ត្រីកាណាដា, លោក António Guterres អគ្គលេខាធិការអង្គការសហប្រជាជាតិ, ព្រះចៅស៊ុលតង់ នៃប្រទេសព្រុយណេ, លោកAnthony Albanese នាយករដ្ឋមន្ត្រី អូស្ត្រាលី, និងលោក Ferdinand Marcos Jr ប្រធានាធិបតីហ្វីលីពីន នឹងត្រូវធ្វើដំណើរចាកចេញពីប្រទេសកម្ពុជា ក្រោយពីបានចូលរួមប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ ប្រកបដោយជោគជ័យរួចមក។

សម្តេចតេជោ ហ៊ុន សែន បានថ្លែងក្នុងអញ្ជើញធ្វើសន្និសីទសារព័ត៌មាន ស្ដីពី លទ្ធផលនៃកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ កាលពីល្ងាចថ្ងៃទី ១៣ ខែវិច្ឆិកាថា ដោយ​សារតែប្រទេសកម្ពុជា មានសន្តិភាព និងគ្មានអំពើភេរវកម្មនោះ ទើបធ្វើឲ្យមេដឹកនាំអាស៊ាន និងមេដឹកនាំពិភពលោក ហ៊ានមកចូលរួមកិច្ចប្រជុំនាពេលនេះ។ ម្យ៉ាងទៀត ក៏ដោយសារតែកម្ពុជា​ អាចគ្រប់គ្រងជំងឺកូវីដ-១៩ បានផងដែរ៕