ព័ត៌មានជាតិ

កម្លាំងសាលាស្រុកសេសាន ចុះជួយប្រមូលផលស្រូវកសិករនៅភូមិបានបុង ឃុំភ្លុក

បានផុស

២ years មុន

នៅ

ថ្ងៃចន្ទ ១៤ វិច្ឆិកា ២០២២

ដោយ

កម្លាំងសាលាស្រុកសេសាន ចំនួនជាង ៣០ នាក់ ចុះជួយការងារប្រមូលផលស្រូវកសិករនៅភូមិបានប៊ុង ឃុំភ្លុក ស្រុកសេសាន ដើម្បីពន្លឿនការងារច្រូតកាត់ឲ្យទាន់រដូវកាល ក្នុងពេលដែលកសិករកំពុងខ្វះខាតកម្លាំងច្រូតកាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុវណ្ណ ពិសេដ្ឋ អភិបាលស្រុកសេសាន បញ្ជាក់ថា នេះក៏ជាការជួយពន្លឿនដល់ការងារប្រមូលផលស្រូវឲ្យទាន់រដូវកាល និងបានបញ្ចៀសពីការខូចខាត ដោយសារសត្វចង្រៃស៊ីបំផ្លាញដូចជា សត្វកណ្ដុរជាដើម។

លោកបន្តថា ឆ្នាំនេះផលស្រូវកសិករ ទទួលបានទិន្នផលល្អជាងឆ្នាំកន្លងមក ដោយសារតែទឹកភ្លៀងអំណោយផល តាំងពីដើមរដូវរហូតមកដល់ចុងរដូវ ថ្វីត្បិតតែនៅស្រុកសេសាននេះ ស្រូវស្រែមួយចំនួនបានរងការលិចលង់ដោយសារជំនន់ទឹកភ្លៀងកន្លងមកក៏ដោយ។

លោកអភិបាលស្រុក សូមឲ្យបងប្អូនកសិករយើង រួសរាន់ ក្នុងការច្រូតកាត់ ហើយបើមានលទ្ធភាព អាចប្រែក្លាយផ្ទៃដីដែលមានប្រភពទឹក ត្រូវនាំគ្នាបន្តដាំដំណាំរួមផ្សំផ្សេងៗទៀត ដើម្បីស្ដារសេដ្ឋកិច្ចស្បៀងប្រចាំគ្រួសារឲ្យមានភាពរីកចម្រើនឡើងទ្វេដង។

លោកស្រីបញ្ចា កសិករម្ចាស់ស្រែនៅភូមិបានបុង ឃុំភ្លុក បានសំដែងការសាទរដល់ថ្នាក់ដឹកនាំស្រុក កងកម្លាំងប្រដាប់អាវុធ រួមនឹងកម្លាំងមន្ត្រីរាជការ បានមកជួយច្រូតកាត់ប្រមូលផលស្រូវ ពិតជាបានសម្រាលដល់ការចំណាយថវិកាក្នុងការជួលកម្លាំងមកច្រូតកាត់។

លោកស្រីថា សកម្មភាពនេះបានបង្ហាញពីការលះបង់ ពេលវេលា របស់ថ្នាក់ដឹកនាំស្រុក ក៏ដូចជា មន្ត្រីរាជការរបស់យើងទាំងអស់គ្នា នៅថ្ងៃឈប់សម្រាកពីការងារ បានមកជួយកសិករយើង ដោយមិនរើសអើង។

សូមបញ្ជាក់ថា នៅស្រុកសេសាន ខេត្តស្ទឹងត្រែង កសិករប្រមាណ ៨០% ធ្វើការងារបង្កបង្កើនផលស្រូវ ១៥% ទៀត ធ្វើដំណាំចម្ការ និង ៥% ពួកគាត់ប្រកបរបរលក់ដូរ។ នៅឆ្នាំ ២០២២ នេះ កសិករយើងអនុវត្តការងារបង្កបង្កើនផលបានជាង ៥.៧០០ ហិកតា បច្ចុប្បន្នប្រមូលផលស្រូវបានជាង ១៥០០ ហិកតា ស្មើនឹង ២០% នៅសេសសល់ កំពុងតែធ្វើការប្រមូលផលបន្ត៕

អត្ថបទ ៖ ងិន លីម