ថ្លៃអគ្គិសនី​ចុះ​នៅ​ត្រឹម ៤៨០ រៀល​ សម្រាប់​អ្នក​ធ្វើកសិកម្មនៅពេលយប់

កសិករ​និងអ្នកដែល​ប្រកប​របរ​លើ​វិស័យ​កសិកម្ម​ អាច​ទៅ​ស្នើ​សុំ​អាជ្ញាធរ​និង​សេវាករ​អគ្គិសនី​ដើម្បី​ទទួល​បាន​លក្ខខណ្ឌ​អនុគ្រោះ​លើ​ថ្លៃ​ប្រើប្រាស់​អគ្គិសនី តាម​គោលនយោបាយ​គាំទ្រ​របស់​រដ្ឋាភិបាល។

លោក ឌិត ទីណា រដ្ឋមន្រ្តី​ក្រសួង​កសិកម្ម រុក្ខា​ប្រមាញ់​និង​នេសាទ​បាន​ថ្លែង​ថា ​តាមរយៈការ​ចុះ​សាកសួរ​ជាមួយ​កសិករ​ ភាគច្រើនពួកគាត់​​មិន​បាន​ទទួល​បាន​ព័ត៌មាន​ពី​គោលការណ៍​អនុគ្រោះ​ថ្លៃ​អគ្គិសនី​នេះទេ ខណៈគោលនយោបាយនេះ​រដ្ឋាភិបាល​បាន​ដាក់​​ឲ្យ​អនុវត្ត​តាំង​ពី​ឆ្នាំ​២០២១។

លោករដ្ឋមន្រ្តី​បន្ត​ថា ក្រសួង​កសិកម្ម​ ​រុក្ខា​ប្រមាញ់​និង​នេសាទ​ បាន​រៀបចំ​កិច្ច​សន្ទនា​ស្តី​ពី​ការ​​ប្រើប្រាស់​ថាមពល​អគ្គិសនី​សម្រាប់​វិស័យ​កសិកម្ម ដោយ​មាន​ចូលរួមពី​​រដ្ឋមន្រ្តី​ក្រសួង​រ៉ែ​និង​ថាមពល និងមន្រ្តី​ជាន់ខ្ពស់​មក​ពី​អាជ្ញាធរ​អគ្គិសនី​កម្ពុជា ដើម្បីផ្សព្វផ្សាយឲ្យ​បានទូលំទូលាយពីគោលនយោបាយ​អនុគ្រោះ​ថ្លៃ​អគ្គិសនី​ ​ធ្វើ​យ៉ាងណា​ឲ្យកសិករ​និង​អ្នកប្រកប​របរ​វិស័យកសិកម្ម​ទទួលបាន​ព័ត៌មាន​និង​ចូលរួមអនុវត្ត​ឲ្យ​បាន​ពេញលេញ។

លោក ស៊ុយ សែម រដ្ឋមន្ត្រី​ក្រសួង​រ៉ែ​និង​ថាមពល​បាន​ថ្លែង​ថា​ វិស័យកសិកម្ម និង​ឧស្សាហកម្មជាវិស័យ​ស្នូល​ដែល​រដ្ឋាភិបាល​បានយកចិត្តទុកដាក់បំផុត​។ កសិកម្ម​ជា​វិស័យ​មួយ​មានបញ្ហាប្រឈម​ច្រើននិង​ចាយទុនខ្ពស់ រហូត​លោក​បានប្រដូច​អ្នកហ៊ាន​ប្រកប​របរ​កសិកម្មថា​ជាអ្នកក្លាហានទៀតផង។

លោក​ ស៊ុយ សែម បន្ត​ថា រដ្ឋាភិបាល​បាន​ដាក់​ចេញ​គោលនយោបាយ​អនុគ្រោះ​ថ្លៃអគ្គិសនី​សម្រាប់​អ្នកប្រកប​របរ​និង​ធ្វើការពាក់ព័ន្ធ​វិស័យ​កសិកម្ម​ ដោយ​ទទួលបានការអនុគ្រោះថ្លៃអគ្គិសនី ៤៨០ រៀល ក្នុង ១ គីឡូវ៉ាត់ម៉ោង សម្រាប់ប្រើប្រាស់នៅពេលយប់ចាប់ពីម៉ោង៩យប់ ដល់៧ព្រឹក។​។

លោកឲ្យដឹងថា សកម្មភាពនៅក្នុងវិស័យកសិកម្មរួមមាន ការដាំដុះ ការចិញ្ចឹមសត្វ និងការនេសាទ ត្រូវបានចាត់ទុកជាវិស័យដែលទទួលបានការអនុគ្រោះពីគោលនយោបាយនេះ។

លោកបន្តថា ផែនការ​កាត់​បន្ថយថ្លៃ​អគ្គិសនីសម្រាប់សម្រាប់​វិស័យ​កសិកម្ម​​គឺជា​ផ្នែក​មួយ​នៃ​គោលនយោបាយ​របស់​រាជរដ្ឋាភិបាល​ក្នុង​ការលើក​ទឹកចិត្ត​ដល់​កសិករ​។

លោក កែវ រតនៈ រដ្ឋមន្រ្តី​ប្រតិភូ​អមនាយករដ្ឋមន្រ្តី និងជាអគ្គនាយក​អគ្គិសនី​កម្ពុជា​បាន​ឲ្យ​ដឹង​ដែរ​ថា អាជ្ញាធរ​អគ្គិសនី​កម្ពុជា​នឹង​ចូលរួម​សហការ​ ដើម្បី​ឲ្យ​គោលនយោបាយ​អនុគ្រោះ​ថ្លៃ​អគ្គិសនី​របស់រដ្ឋាភិបាល​ត្រូវ​បាន​​អនុវត្ត​ឲ្យ​បាន​ពេញលេញ។

លោក កែវ រតនៈ ​​បានពន្យល់ពីនីតិវិធីដែលអាចជួយឲ្យកសិករ ម្ចាស់កសិដ្ឋាន អ្នកផលិត អ្នកកែច្នៃក្នុងវិស័យកសិកម្ម ទទួលបានការអនុគ្រោះថ្លៃអគ្គិសនី ៤៨០ រៀល ក្នុង ១ គីឡូវ៉ាត់ម៉ោង សម្រាប់​​ប្រើប្រាស់នៅពេលយប់។

ចំពោះនីតិវិធីអ្នកប្រើប្រាស់កសិកម្មទាំងអស់ ត្រូវតែមកដាក់ពាក្យទៅសេវាករអគ្គិសនីក្នុងមូលដ្ឋាន ហើយបើសិនជាក្រុមសហគមន៍ត្រូវមាន​តំណាងម្នាក់ដែលទទួលស្គាល់ពីអាជ្ញាធរ។

លោកអះអាងដោយ​​ធានានឹង​​ដោះស្រាយ​​រាល់បញ្ហា​រាំង​ស្ទះ ធ្វើយ៉ាងណា​ឲ្យកសិករ​ទទួលបានផល​ប្រយោជន៍​ពី​គោលនយោបាយ​អនុគ្រោះថ្លៃ​អគ្គិសនី​ ដើម្បីរួមចំណែក​ធ្វើ​ឲ្យវិស័យ​កសិកម្ម​ក្នុងប្រទេស​កម្ពុជា​មានភាព​រីកចម្រើន។

លោក យឹម វិសិដ្ឋ ប្រធាន​អាជ្ញាធររ​អគ្គិសនី​កម្ពុជា​បានលើកពីគុណប្រយោជន៍នៃកា​រដាក់ចេញ​គោលនយោបាយ​​អនុគ្រោះ​ថ្លៃ​អគ្គិសនីរបស់រដ្ឋាភិបាល តិច​ឬ​ច្រើន កសិករនឹង​ទទួល​បាន​ផល​ចំណេញ​តាមរយៈ​កាត់​​បន្ថយ​ថ្លៃ​ដើម​ផលិត​ឲ្យចុះទាប៕