កម្ពុជា ត្រៀមសហការជាមួយផលិតករភាពយន្តចិន ថតភាពយន្តបែបប្រវត្តិសាស្ត្រ នៅកម្ពុជា

ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា ស្វាគមន៍គម្រោងថតភាពយន្តបែបប្រវត្តិសាស្រ្តរបស់ផលិតករភាពយន្ត នៃសាធារណរដ្ឋប្រជាមានិតចិន នៅលើទឹកដីនៃព្រះរាជាណាចក្រកម្ពុជា។

លោកស្រីបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ នៅថ្ងៃទី១៥ ខែវិច្ឆិកា ឆ្នាំ២០២២នេះ បានអនុញ្ញាតឱ្យលោក Xie Xudong អគ្គនាយកក្រុមហ៊ុន Zhong Fang international Investment នៃសាធារណរដ្ឋប្រជាមានិតចិន ចូលជួបសម្តែងការគួរសម នៅទីស្តីការក្រសួងវប្បធម៌ និងវិចិត្រសិល្បៈ ដើម្បីជម្រាបជូនពីគម្រោងនៃការផលិតភាពយន្ត ពាក់ព័ន្ធនឹងប្រវត្តិសាស្រ្តកម្ពុជាចិន នាសតវត្សទី១៣ នៅលើទឹកដីនៃព្រះរាជាណាចក្រកម្ពុជា។

លោកស្រីបណ្ឌិតសភាចារ្យ បានស្វាគមន៍ចំពោះគម្រោងនៃការថតភាពយន្តរឿងប្រវត្តិសាស្រ្តនេះ នៅលើទឹកដីនៃព្រះរាជាណាចក្រកម្ពុជា ដែលមានអត្ថប្រយោជន៍ដល់ការផ្សព្វផ្សាយអំពីកម្ពុជា ពិសេសផ្នែកវប្បធម៌ និងទេសចរណ៍។ ជាមួយនេះ ដើម្បីជួយសម្របសម្រួលដល់ផលិតករ លោកស្រីបណ្ឌិតសភាចារ្យបានស្នើដល់ក្រុមហ៊ុនផ្តល់អត្ថបទនិពន្ធពិស្តារ ដើម្បីក្រុមការងារក្រសួងជួយពិនិត្យសិក្សា និងស្នើឱ្យមានការជួបពិភាក្សាផ្ទាល់រវាងផលិតករ អ្នកដឹកនាំរឿង ជាមួយមន្រ្តីជំនាញរបស់ក្រសួង ដើម្បីជួយសម្រួលខ្លឹមសារឱ្យកាន់តែមានភាពត្រឹមត្រូវស្របតាមប្រវត្តិសាស្រ្ត។

គួរបញ្ជាក់ថា ការទាក់ទាញផលិតករភាពយន្តបរទេសឱ្យមកថតភាពយន្តនៅក្នុងព្រះរាជាណាចក្រកម្ពុជា គឺជាការងារអាទិភាពមួយរបស់ក្រសួងវប្បធម៌ និងវិចិត្រសិល្បៈ ដែលមានចែងក្នុងគោលនយោបាយជាតិស្តីពីវប្បធម៌៕