ថវិកាជាង ១៣ម៉ឺនដុល្លារ ទទួលបានពីការ​”រត់ជាមួយសាយ ៤សែនជំហាន” ជួយ​មន្ទីរពេទ្យកុមារអង្គរ

លោក អួន បឋម ហៅ សាយ បានប្រកាសបិទកម្មវិធី “រត់ជាមួយសាយ ៤សែនជំហាន” ពីភ្នំពេញទៅសៀមរាប នៅថ្ងៃទី ១៥ ខែវិច្ឆិកា ដោយទទួលបានថវិការ ១៣០,៣១៣ ដុល្លារ។

សាយ បានសរសេរនៅលើផេកផ្លូវការដូច្នេះថា« ខ្ញុំបាទសាយ និងក្រុមការងារ #RUNWITHSAI សុំធ្វើការ​ប្រកាសបិទកម្មវិធី “រត់ជាមួយសាយ ៤សែនជំហាន” ពីភ្នំពេញទៅសៀមរាប នៅថ្ងៃនេះត្រូវនឹងថ្ងៃទី ១៥ ខែវិច្ឆិកា ២០២២ ដែលបូកសរុបចំនួនថវិកាបរិច្ចាគ ពីពុកម៉ែបងប្អូនប្រជាពលរដ្ឋកម្ពុជា សិល្បករ សិល្បការិនី ក្រុមគ្រួសារស.ស.យ.ក មន្ត្រីរាជរដ្ឋាភិបាល លោកឧកញ៉ា ឯកឧត្តម លោកលោកស្រីទាំងអស់ ស្មើនឹងចំនួនទឹកប្រាក់ ១៣០,៣១៣ ដុល្លារ​សហរដ្ឋអាមេរិក»។

បើតាម សាយ បានបញ្ជាក់ថា មន្ទីរពេទ្យកុមារអង្គរមានតម្រូវការ ពី ៣០ ម៉ឺនដុល្លារ ទៅ ៤០ ម៉ឺនដុល្លារ ក្នុងមួយឆ្នាំ ដើម្បីផ្គត់ផ្គង់ព្យាបាលផ្នែកជំងឺមហារីកទៅកាន់កុមារកម្ពុជា។ ជាមួយនឹងតម្រូវការ សាយ បានអំពាវនាវ ដល់ប្រជា​ពលរដ្ឋកម្ពុជា សូមបន្តបរិច្ចាគ និងបង្កើតគម្រោងផ្សេងៗ ដើម្បីទទួលបាននូវការឧបត្ថម្ភ ការបរិច្ចាគ​ផ្គត់ផ្គង់​ដល់មន្ទីរពេទ្យកុមារអង្គរប្រកប​ដោយ​និរន្តរភាព។

លោក Kenro Izu ស្ថាបនិកមន្ទីរពេទ្យកុមារអង្គរ ជាជនជាតិជប៉ុន បានចំណាយពេលជាង ២០ឆ្នាំ ក្នុងការបង្កើតផ្គត់ផ្គង់ និងស្វែងរកគ្រប់វិធី ដើម្បីរក្សាឲ្យមន្ទីរពេទ្យកុមារអង្គរដំណើរការរហូតមកដល់សព្វថ្ងៃ និងបន្តទៅមុខទៀត។

តាមរយៈសកម្មភាពកម្មវិធី រត់ដើម្បីសប្បុរសធម៌ជាមួយសាយ និងជំរុញទឹកចិត្ត ដល់ជនរួមជាតិកម្ពុជាទាំងអស់ អោបក្រសោបជួយគ្នាក្នុងគ្រាលំបាក និងប្រឹងប្រែងទាំងអស់គ្នា ដើម្បីអនាគតកុមារកម្ពុជា ពិសេសគឺអាយុជីវិត​កុមារដែលទៅទទួលការព្យាបាលនៅមន្ទីរពេទ្យកុមារអង្គរ។

សាយ សង្ឃឹមថា នឹងមានអ្នកបន្តធ្វើសកម្មភាព ជួយជំរុញដល់ការបរិច្ចាគទៅកាន់មន្ទីរពេទ្យកុមារអង្គរ និងគិតគូរដល់​បញ្ហាសង្គម ប្រៀបប្ដូរជាបញ្ហារបស់ខ្លួនឯង ព្រមទាំងការចូលរួមជួយកែតម្រូវក្នុងន័យស្ថាបនា និងចូលរួមក្នុងកិច្ចការ​ងារសង្គម ដើម្បីទទួលបាននូវសង្គមដ៏ល្អប្រសើរដែលយើងចង់បាននាថ្ងៃអនាគតទាំងអស់គ្នា៕