រោងម៉ាស៊ីនកិនស្រូវ ធានាទិញស្រូវផ្ការំដួលតម្លៃ ១,០៤០រៀលក្នុងមួយគីឡូក្រាម ជួយកសិករខេត្តបាត់ដំបង

ក្រោយពីលោក ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានចាត់អនុរដ្ឋលេខាធិការចំនួន២រូប រួមមានលោក ឃី កុសល និងលោក ឈុំ ឆុនលី និងមន្រ្តីជំនាញនៃអគ្គនាយកដ្ឋានកសិកម្ម ឱ្យមកដោះស្រាយ​បញ្ហាថ្លៃស្រូវរួចមក ក្រុមការងារក្រសួង បានមកដល់ខេត្តបាត់ដំបង បានប្រជុំជាមួយអ្នកពាក់ព័ន្ធ ជាពិសេស​ចុះជួបជាមួយបងប្អូនប្រជាកសិករ ។

យោងតាមសេចក្តីប្រកាសព័ត៌មានរបស់ក្រសួងកសិកម្ម បានឱ្យដឹងថា បន្ទាប់ពីបានជួបប្រជុំពិភាក្សា និងបាន​ចុះទៅពិនិត្យដល់ទីតំាងជាក់ស្តែង លោកឧកញ៉ា ភូ ពុយ អគ្គនាយកនៃរោងម៉ាស៊ីនកិនស្រូវបៃតង បានស្ម័គ្រ​ចិត្តចូលរួមសហការជាមួយរាជរដ្ឋាភិបាល ក្នុងការដាក់ចេញនូវគោលការណ៍រក្សាស្ថេរភាពថ្លៃស្រូវ ដោយបាន​កំណត់នូវថ្លៃធានាទិញគោលសម្រាប់ស្រូវផ្ការំដួលប្រភេទលេខ១ មិនឱ្យក្រោម ៩បាត/គីឡូក្រាម ឬ ១០៤០​រៀល/គីឡូក្រាម ចាប់ពីល្ងាចថ្ងៃទី១៦ ខែវិច្ឆិកា ឆ្នាំ២០២២។

ជាមួយគ្នានេះ ក្រសួងកសិកម្ម រុក្ខាប្រមាញ់ និងនេសាទ បានសហការជាមួយរដ្ឋបាលឃុំ ដើម្បីផ្សព្វផ្សាយពី​ថ្លៃកំណត់ខាងលើ ព្រមទាំងចាត់ឱ្យមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង ចុះតាមដាន ការអនុវត្តនេះដោយមិនឱ្យប្រជាកសិករយើងបាត់បងផលប្រយោជន៍ ដោយគ្មានហេតុផលនោះឡើយ។

ក្រសួងកសិកម្ម បានអំពាវនាវដល់ប្រជាកសិករ ដែលជួបបញ្ហាជាក់ស្តែងឱ្យទាក់ទងផ្ទាល់ទៅក្រុមការងាររបស់ក្រសួង តាមលេខទួរសព្ទ ០៩៥ ៩៥១ ១១១( សម្រាប់ខេត្តបាត់ដំបង) និងលេខ ០១២ ៨៣៨ ៩៣៧ (សម្រាប់ខេត្តបន្ទាយ​មានជ័យ) ដើម្បីឱ្យក្រុមការងារក្រសួងបានទទួលព័ត៌មានពេញលេញ និងធ្វើការសម្របសម្រួលជាមួយ​រោងម៉ាស៊ីនកិន​ស្រូវនៅក្នុងតំបន់។

បើតាមសេចក្តីប្រកាសព័ត៌មាន ក្រុមការងារក្រសួងកសិកម្ម រុក្ខាប្រមាញ់ និងនេសាទ និងវិស័យឯកជនពាក់ព័ន្ធដែលមាន លោកឧកញ៉ា ភូ ពុយ ជាអ្នកជាអ្នកធានាអនុវត្តគោលការនេះ នឹងបន្តការងារទៅខេត្តបន្ទាយមានជ័យទៀត៕