អង្ករកម្ពុជាពូជ “ផ្ការំដួល” ទទួលបានជ័យ​លាភីលេខ​១ អង្ករល្អដាច់គេ​លំដាប់ថ្នាក់​ពិភពលោក​ឆ្នាំ ២០២២

អង្ករកម្ពុជាពូជ “ផ្ការំដួល” ដែលទទួលបានជ័យលាភីលេខ១ សម្រាប់ឆ្នាំ២០២២ ជាអង្ករល្អដាច់គេ​លំដាប់ថ្នាក់​ពិភពលោក​ ក្នុងការប្រកួតប្រជែងនៃវេទិកាស្រូវ-អង្ករពិភពលោក​ នៅខេត្តភូកេត​ ប្រទេសថៃ នាថ្ងៃទី ១៧ ខែ វិច្ឆិកានេះ។

លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអបអរ និងលើកឡើងថា នេះគឺជា​លើកទី៥ហើយ​ ដែលអង្ករកម្ពុជា បានទទួលជ័យលាភី​ និងនាំមកនូវមោទនភាពសម្រាប់កម្ពុជា។

ប្រធានសហព័ន្ធស្រូវអង្ករ លោក ឧកញ៉ា សុង សារ៉ន បានសូមអគុណដល់ក្រុមការងារសហព័ន្ធស្រូវអង្ករ សមាជិករោងម៉ាស៊ីនកិនស្រូវ សហគមន៍កសិកម្ម ក្រសួងកសិកម្ម ក្រសួងពាណិជ្ជកម្ម ដែលផ្តល់គាំ​ទ្រផលិត​អង្ករល្អដាច់គេ ដើម្បីចួលរួមប្រកួត និងនាំពានរង្វាន់មកកម្ពុជា។

លោក សុង សារ៉ន បានបន្តថា កម្ពុជា បានទទួលជ័យលាភីនេះ ចំនួន៤លើកមកហើយ ដែលឆ្នាំ ២០២២នេះ គឺជាលើកទី៥។ ដោយក្នុងនោះ គឺនៅឆ្នាំ២០១២ ឆ្នាំ២០១៣ ឆ្នាំ២០១៤ ឆ្នាំ២០១៨ និងចុងក្រោយនៅឆ្នាំ២០២២នេះ៕