បុរស-នារី សាច់ដុំជាង ៥០នាក់ ត្រៀមប្រកួតអួតសាច់ដុំ និងក្បាច់ពិសេសៗ ក្នុងព្រឹត្តិការណ៍កីឡាជាតិលើកទី៣

កីឡាករ -កីឡាការិនីប្រមាណ ៥០នាក់ ត្រៀមខ្លួនប្រកួតកីឡាវប្បកម្ម និងលំហាត់ប្រាណជាមួយនឹងវិញ្ញាសារ០៩ផ្សេងទៀត នៅក្នុងព្រឹត្តិការណ៍កីឡាជាតិលើកទី៣ ដែលនឹងប្រព្រឹត្តទៅនៅថ្ងៃទី២៥-២៦ ខែវិច្ឆិកា ឆ្នាំ២០២២ វេលាម៉ោង ៩ព្រឹក ដល់ម៉ោង ៤ល្ងាច នៅឯសាលក្នុងផ្សារទំនើបអ៊ីអន២ សែនសុខ។

កីឡាកាយវប្បកម្ម និងលំហាត់ប្រាណ មិនមែនត្រឹមតែជាកីឡាហាត់យកសាច់ដុំធំៗនោះទេ ប៉ុន្តែ វាជាកីឡាមួយប្រភេទដែលអាចឱ្យអ្នកលេងកីឡានេះ មានអារម្មណ៍ធូរស្បើយ ស្រស់ស្រាយ កាត់បន្ថយស្ត្រេស និងកាត់បន្ថយជំងឺរ៉ាំរ៉ៃ បន្ទាប់ពីការបញ្ចប់ការងារផ្សេងៗផងដែរ។

ចំពោះវិញ្ញាសារ ០៩ ផ្សេងទៀតសម្រាប់ប្រកួតក្នុងកីឡាជាតិលើកទី៣ មានដូចជា៖

• បុរសសាច់ដុំ ទម្ងន់ ៦០គីឡូក្រាម
• បុរសសាច់ដុំ ទម្ងន់ ៧០គីឡូក្រាម
• បុរសសាច់ដុំ ទម្ងន់ ៨០គីឡូក្រាម
• បុរសសាច់ដុំ ទម្ងន់ +៨០គីឡូក្រាម
• បុរសរូបរាងសង្ហារ កំពស់រហូតដល់ ១៧០សង់ទីម៉ែត្រ
• បុរសរូបរាងសង្ហារ កំពស់រហូតដល់ +១៧០សង់ទីម៉ែត្រ
• បុរសបង្ហាញម៉ូត កំពស់រហូតដល់ ១៧០សង់ទីម៉ែត្រ
• បុរសបង្ហាញម៉ូត កំពស់រហូតដល់ ១៧០សង់ទីម៉ែត្រ
• នារីបង្ហាញរូបរាងស្រស់ស្អាត។

គួរបញ្ជាក់ថា ក្នុងចំណោមកីឡា៣៨ប្រភេទ កីឡាកាយវប្បកម្ម និងលំហាត់ប្រាណ ក៏ត្រូវបានសម្រេចឱ្យដាក់បញ្ចូលក្នុងព្រឹត្តិការណ៍កីឡាជាតិលើកទី៣ខាងមុខផងដែរ។ ដូច្នេះ សម្រាប់លោកអ្នកដែលគាំទ្រក្នុងវិស័យកីឡា អាចចូលរួមព្រឹត្តិការណ៍កីឡាជាតិលើកទី៣ខាងមុខបាន ដើម្បីឱ្យកីឡាជាតិឈានទៅកាន់ស៊ីហ្គេមឆ្នាំ២០២៣ ខាងមុខ៕

ដោយ៖ អុន ស្រីមាន