ព័ត៌មានជាតិ

រយៈពេល១០ខែឆ្នាំនេះមានជនរងគ្រោះ ដោយសារមីន និងសំណល់ជាតិផ្ទុះចំនួន៤០ករណីថយចុះ៥%

បានផុស

២ years មុន

នៅ

ថ្ងៃអាទិត្យ ២០ វិច្ឆិកា ២០២២

ដោយ

យោងតាមរបាយការណ៍របស់អាជ្ញាធរមីនកម្ពុជាបានឱ្យដឹងថាក្នុងរយៈពេល១០ខែឆ្នាំ២០២១នេះមានជនរងគ្រោះដោយសារមីន និងសំណល់ជាតិផ្ទុះពីសង្រ្គាមចំនួន៤០ ករណីមានការថយចុះ៥ភាគរយបើប្រៀបធៀបទៅនឹងរយៈពេល ដូចគ្នាក្នុងឆ្នាំ២០២១កន្លងទៅ។

របាយការណ៍ដដែលបានបន្តថា ក្នុងចំណោមជនរងគ្រោះចំនួន៤០នាក់ក្នុងនោះមានស្លាប់ចំនួន១០នាក់ បាត់បង់អវយវៈ ៧នាក់ និង២៣នាក់ផ្សេងទៀតរងរបួសស្រាល។ករណីគ្រោះថ្នាក់ទាំងនោះ គឺកើតឡើងនៅខេត្តចំនួន១១ រួមមានខេត្តព្រះវិហារ បាត់ដំបង កំពង់ធំ ស្វាយរៀង ពោធិ៍សាត់ បន្ទាយមានជ័យ រតនគីរី ក្រចេះ ប៉ៃលិន សៀមរាប និងខេត្តព្រះសីហនុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមផែនការយុទ្ធសាស្ត្រជាតិសកម្មភាពមីន ឆ្នាំ២០១៨-២០២៥បានឲ្យដឹងថា នៅកម្ពុជាមានផ្ទៃដីសង្ស័យមានផលប៉ះពាល់ដោយសារមីន គ្រាប់បែកចង្កោម និងសំណល់ជាតិផ្ទុះពីសង្គ្រាមប្រមាណជាង ១៩៧០គីឡូម៉ែត្រការ៉េ ក្នុងនោះប្រមាណ ៨៧៧គីឡូម៉ែត្រការ៉េ ជាដីមានផលប៉ះពាល់ខ្ពស់ដោយសារមីន ៤៩៩គីឡូម៉ែតការ៉េ ជាដីប៉ះពាល់ដោយគ្រាប់បែកចង្កោម និង ៣៣៣គីឡូម៉ែត្រការ៉េ ជាដីមានផលប៉ះពាល់ដោយសារសំណល់ជាតិផ្ទុះពីសង្រ្គាម។ផ្ទៃដីមានគ្រាប់មីននិងយុទ្ធភ័ណ្ឌមិនទាន់ផ្ទុះជិត២ពាន់គីឡូម៉ែត្រការ៉េនេះកម្ពុជាត្រូវការថវិកាប្រមាណ ៤០៦លានដុល្លារ សម្រាប់បោសសំអាតរយៈពេលពីឆ្នាំ ២០១៨ ដល់ឆ្នាំ២០២៥ខាងមុខ។

រដ្ឋាភិបាលកម្ពុជា បេ្តជ្ញាបោសសំអាតមីន និងគ្រាប់មិនទាន់ផ្ទុះ ដែលសេសសល់ពីសង្គ្រាមឲ្យអស់នៅឆ្នាំ២០២៥ ខាងមុខ។ ប្រទេសដែលផ្តល់ថវិកាសម្រាប់វិស័យបោសសំអាតមីន ច្រើនជាងគេ រួមមានប្រទេសជប៉ុន ចិន កូរ៉េ អូស្ត្រាលី អឺរ៉ុប និងអាមេរិកជាដើម។

គូរបញ្ជាក់ថា ចាប់ពីឆ្នាំ១៩៧០ ដល់ខែតុលា ឆ្នាំ២០២២ ចំនួនអ្នកស្លាប់ដោយសារជាន់គ្រាប់មីន និងគ្រាប់យុទ្ធភណ្ឌមិនទាន់ផ្ទុះ មានចំនួន ជិត២ម៉ឺននាក់ (១៩,៨១៨) រងរបួសជាង ៤ម៉ឺន ៥ពាន់នាក់ (៤៥,១៨៦)៕

អត្ថបទ៖ សំអឿន