ប្រធានមន្ទីរ​បរិស្ថាន​ប្រាប់​បន្ថែម​ សភាពសត្វកែះរមៀលធ្លាក់ពីជ្រោះ

សត្វកែះមួយក្បាលត្រូវបានមន្ត្រីឧទ្យានុរក្សនៃដែនជម្រកសត្វព្រៃភ្នំសំកុសយកពី​ប្រជាពលរដ្ឋ ក្រោយ​ជាប់អន្ទាក់របស់ព្រាន​កាលពីថ្ងៃទី២១ខែវិច្ឆិកាឆ្នាំ២០២២ ហើយបានរមៀលធ្លាក់ពីលើជ្រោះចុះមកក្រោម ហើយប្រជាពលរដ្ឋចាប់បាន ពេលនេះកំពុងយកចិត្តទុកដាក់ពីមន្ទីជំនាញសហការជាមួយក្រុមពេទ្យជំនាញ។

បើតាមការអះអាងពីមន្ត្រីជំនាញបានប្រាប់ថា សត្វកែះ១ក្បាលដែលបានរងគ្រោះបាន​របួសជើង ក្រោយធ្លាក់ពីលើជ្រោះ។

លោក កប បូរ៉ាន់ ប្រធានមន្ទីរបរិស្ថានខេត្តបានប្រាប់កម្ពុជាថ្មីនៅថ្ងៃទី ២២ខែវិច្ឆកានេះថា បច្ចុប្បន្នសត្វកែះដែលបាន​យកពីប្រជាពលរដ្ឋរងគ្រោះពីសំណាក់ព្រានកាលពីថ្ងៃទី២១ខែវិច្ឆកា កំពុងរក្សាទុកនៅស្នាក់ការតំបន់ប្រើប្រាស់ច្រើនយ៉ាងក្នុងស្រុកសំឡូតដើម្បីជួយសង្គ្រោះ ដោយបានសហការជាមួយក្រុមពេទ្យជំនាញពីអង្គការ “វាយ វ៉ាអូលែន” ដែលមកពីភ្នំឱរ៉ាល់ខេត្តពោធិ៍សាត់ ដើម្បីមកជួយសង្គ្រោះ។

លោក​បាន​ប្រាប់ពី​សភាពសត្វកែះដែលកំពុង​ត្រូ​វបាន​ជួ​យ​សង្រ្គោះ​ ពេលខ្លះវាអាចក្រោកបាន ពេលខ្លះវាប្រឹងងើបតែមិនទាន់បាន ក្រោយពីមន្ត្រីជំនាញបានជួយសង្គោះជាបឋម។

លោកប្រធានមន្ទីរបញ្ជាក់ថា អ្នកស្រី សុវណ្ណា ដែលជាប្រធានអង្គការបានបញ្ជូនក្រុមពេទ្យជំនាញមកដល់ហើយ ដើម្បីជួយសង្គ្រោះឲ្យបានទាន់ពេល ហើយលោកសង្ឃឹមថានឹងបានជាសះស្បើយឡើងវិញក្នុងពេលដ៏ខ្លីខាងមុខនេះ៕

អត្ថបទ៖ សៅ សារិទ្ធ