យកកាំភ្លើងកែច្នៃ ឡើងបាញ់សត្វ រាលកៃធ្លាក់​ពី​លើ​ចុងឈើ​ស្លាប់

ខេត្តសៀមរាប៖ បើតាមសេចក្តីរាយការណ៏ពីសមត្ថកិច្ចស្រុកជីក្រែងបានឲ្យដឹងថា នៅវេលាម៉ោង10.15នាទីថ្ងៃទី05.01.2021 មានករណីរាលកៃកាំភ្លើង(កែឆ្នៃ) បណ្ដាលឲ្យយុវជនម្នាក់បានស្លាប់ស្ថិតនៅចំណុចលើភ្នំបុស្សត្រា ( ហៅភ្នំក្បាលខ្មោច ) ចំងាយ14ឝឞ ពីភូមិជ្រៃ ឃុំខ្វាវ ស្រុកជីក្រែង ខេត្តសៀមរាប។

លោក វរសេនីយ៏ ទោ គង់ អឿន អធិការរងនគរបាលស្រុកជីក្រែង​បានឲ្យដឹងថា ជនរងគ្រោះដល់ស្លាប់មានឈ្មោះ រឿន រ៉ូ ភេទប្រុស អាយុ ២៧ឆ្នាំ មានទីលំនៅភូមិជ្រៃ ឃុំខ្វាវ ស្រុកជីក្រែង។ មូលហេតុ ជនរងគ្រោះយកកាំភ្លើងឆ្នុក (កែច្នៃ) ឡើងចុង​ឈើទៅបាញ់សត្វ កំពស់ជាង10ម៉ែត្របណ្តាលឲ្យរាលកៃត្រូវចំពោះ​ខ្លួន​ឯង​ធ្លាក់ពីលើដើមឈើផ្កាប់មុខប៉ះនិងថ្ម បណ្ដាលឲ្យបែកក្បាលផ្នែកខាងមុខ ស្លាប់នៅនិងកន្លែងកើតហេតុ។

បើតាមការបំភ្លឺរបស់ក្រុមគ្រួសារសព ជនរងគ្រោះពិតជាបានរាលកៃអាវុធកែច្នៃត្រូវខ្លួនឯងហើយធ្លាក់ពីលើដើមឈើពិតប្រាកដមែន ពុំមាននណាធ្វើឃាតនោះទេ។ បច្ចុប្បន្នសពត្រូវបានប្រគល់ឲ្យក្រុមគ្រួសារយកមកធ្វើបុណ្យតាមប្រពៃណីខ្មែរ៕

អត្ថបទ៖ គឿនវេត