ព័ត៌មានជាតិ

លោកសុខ ទូច៖ ទេសចរត្រូវគេបោកប្រាស់តាមរយៈរូបភាព ៥ ចំណុចខុសៗគ្នា

បានផុស

២ years មុន

នៅ

ថ្ងៃព្រហស្បតិ៍ ១ ធ្នូ ២០២២

ដោយ

លោកសុខ ទូច ប្រធានរាជបណ្ឌិត្យសភាកម្ពុជាបានលើកឡើងថា សម្រាប់ភ្ញៀវទេសចរនាពេលបច្ចុប្បន្ននេះ ត្រូវបានគេបោកប្រាស់តាមរយៈរូបភាព ៥ ចំណុចខុសៗគ្នា ដែលធ្វើឱ្យទេសចរបាត់បង់ទំនុកចិត្តនិងលែងចង់មកទស្សនានៅប្រទេសកម្ពុជា។ លោកបានអះអាងបែបនេះនៅក្នុងសិក្ខាសាលាពីគម្រោងស្រាវជ្រាវស្ដីពីទេសចរណ៍កម្ពុជា នៅរាជបណ្ឌិតសភាកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងសិក្ខាសាលាកាលពីម្សិលមិញនេះ លោកបណ្ឌិត សុខ ទូច បានឱ្យដឹងថា លោកបានចុះទៅសិក្សាតាមគោលដៅទេសចរណ៍ និងតាមព្រលានយន្តហោះ ដើម្បីដឹងថាទេសចរមកទស្សនា ប្រទេសកម្ពុជាទទួលបានអ្វី និងប្រឈមបញ្ហាអ្វីខ្លះដែលត្រូវដោះស្រាយ។

លោកបានលើករូបភាព ៥ ចំណុចដែលទេសចរ តែងទទួលការបោកប្រាស់រួមមាន៖

ទី១៖ ការបោកប្រាស់តាមរយៈការដឹងជញ្ជូនភូតទីតាំង

លោកសុខ ទូច បានលើកឡើងថា ការបោកប្រាស់ការដឹកជញ្ជូន ឬភូតទីតាំង គឺតាមរយៈរថយន្តដែលដឹកភ្ញៀវទេសចរ ឬម៉ូតូកង់បីណែនាំដឹកភ្ញៀវទេសចរទៅតាមកន្លែងមួយចំនួនដែលខុសពីកន្លែងភ្ញៀវចង់ទស្សនា ដោយហេតុថាភ្ញៀវទេសចរមួយចំនួនមិនបានស្គាល់ច្បាស់ពីកន្លែងនីមួយៗ។

ទី២៖ ការទិញផលិតផលគ្មានគុណភាព

ពាក់ព័ន្ធបញ្ហានេះ ប្រធានរាជបណ្ឌិត្យសភាកម្ពុជាបានបង្ហើបថា មនុស្សមួយចំនួនច្រើនតែណែនាំភ្ញៀវទេសចរឱ្យទិញផលិតផលដែលគ្មានការធានាគុណភាព គ្មានការទទួលខុសត្រូវ ដែលធ្វើឱ្យទេសចរទាំងអស់នោះបាត់បង់ទំនុកចិត្តលែងជឿជាក់ និងលែងមកតទៀត។ ប៉ុន្តែប្រសិនបើអ្នកដែលណែនាំទេសចរប្រកបដោយភាពស្មោះត្រង់ នោះពួកគេនឹងទៅជាមួយដោយស្នាមញញឹម ហើយពេលខ្លះទៀតអាចជួយផ្សព្វផ្សាយបន្ត និងនាំអ្នកមកលេងកម្ពុជាកាន់តែច្រើនជាងមុន។

ទី៣៖ ការធ្វើដំណើរទៅមិនចំគោលដៅ

ជុំវិញបញ្ហានេះ លោកសុខ ទូច បានបង្ហាញថា អ្នកដែលប្រកបមុខរបរជាអ្នកដឹកភ្ញៀវទេសចរខ្លះ ដូចជារថយន្តតាក់ស៊ី ឬម៉ូតូកង់បី ដឹកភ្ញៀវទៅខុសទីតាំង ទៅមើលប្រាសាទបន្ទាយស្រីថាជាប្រាសាទអង្គរតូច ឬពាក់ព័ន្ធការបង់លុយជាដើម។

ទន្ទឹមនេះ លោកប្រធានរាជបណ្ឌិតសភាកម្ពុជា ក៏បានលើកឡើង ២ ចំណុចបន្ថែមទៀតពាក់ព័ន្ធការចំណាយពេលច្រើន និងផ្ទះសំណាក់សណ្ឋាគារ ដែលលោកបង្ហាញឱ្យដឹងថាភ្ញៀវទេសចរត្រូវបានគេបោកប្រាស់ស្តែងចេញឱ្យឃើញតាមរយៈរូបភាពមួយចំនួនដូចខាងលើនេះ។

លោក សុខ ទូច បានមានប្រសាសន៍ថា ព្រោះតែបញ្ហាចេះតែកើតមានលើភ្ញៀវទេសចរ ទើបរាជបណ្ឌិតសភាកម្ពុជាសម្រេចបង្កើតវេបសាយទេសចរណ៍កម្ពុជានេះឡើង ដើម្បីក្លាយជាជំនួយដល់ភ្ញៀវទេសចរដែលបានចូលមកទស្សនាប្រទេសកម្ពុជា៕

ដោយ៖ ថារី