ព័ត៌មានជាតិ

មកដឹងពីមន្ទីរពេទ្យរដ្ឋ មន្ទីរពេទ្យបង្អែក និងមន្ទីរពេទ្យឯកជននៅភ្នំពេញចំនួនប៉ុន្មាន ដើម្បីពង្រឹងលើវិស័យសុខាភិបាល

បានផុស

២ years មុន

នៅ

ថ្ងៃព្រហស្បតិ៍ ១ ធ្នូ ២០២២

ដោយ

វិស័យសុខាភិបាល ជាវិស័យមួយដែលរាជរដ្ឋាភិបាលបានយកចិត្តទុកដាក់យ៉ាងខ្លាំងក្នុងចំណោមវិស័យផ្សេងជាច្រើនទៀត ដើម្បីសុខុមាលភាពប្រជាពលរដ្ឋ។ ក្នុងនោះ ក្រៅពីបង្កើតឲ្យមានមន្ទីរពេទ្យរដ្ឋហើយ ក៏នៅមានមន្ទីរពេទ្យបង្អែកនៅតាមខេត្ត ក្រុង ស្រុក ខណ្ឌ មួយចំនួន នៅទូទាំងប្រទេសថែមទៀត។ បន្ថែមពីលើនេះ រាជរដ្ឋាភិបាល ក៏នៅបានអនុញ្ញាតឲ្យវិស័យឯកជន បង្កើតជាមន្ទីរពហុព្យាបាល ,មន្ទីរសម្រាកព្យាបាល ,និងបន្ទប់សង្គ្រោះជំងឺបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកនៅរាជធានីភ្នំពេញ គិតមកដល់ពេលនេះ មានមន្ទីរពេទ្យរដ្ឋ និងមន្ទីរពេទ្យបង្អែកនៅតាមខណ្ឌជិត ១០ ទីតាំង មណ្ឌលសុខភាពមួយចំនួនធំ និងបន្ទប់សង្គ្រោះជំងឺប្រមាណជាង ១០០០ ទីតាំងថែមទៀត។

ពាក់ព័ន្ធនឹងវិស័យសុខាភិបាលនេះ បើតាមការបញ្ជាក់ពីលោក ងី មានហេង ប្រធានមន្ទីរសុខាភិបាលរាជធានីភ្នំពេញ បានឲ្យដឹងថា នៅរាជធានីភ្នំពេញ មានមន្ទីរពេទ្យរដ្ឋចំនួន ៩ ទីតាំង, មានមន្ទីរពេទ្យបង្អែកចំនួន ០៨ ,មណ្ឌលសុខភាពចំនួន ៤៣ ,ប៉ុស្តិ៍សុខភាពចំនួន ៣៨ ,មានមន្ទីរពេទ្យឯកជន និងមន្ទីរពហុព្យាបាលចំនួន ៧៤ ,មន្ទីរសម្រាកព្យាបាលចំនួន ៣២៩, និងបន្ទប់សង្គ្រោះជំងឺចំនួនជាង ១០០០ ទីតាំង។

មិនត្រឹមតែប៉ុណ្ណឹងទេ ក្រោមចក្ខុវិស័យដ៏ខ្ពង់ខ្ពស់របស់ សម្ដេចតេជោ កាលពីចុងឆ្នាំ ២០២១ សម្តេច បានណែនាំឲ្យលោក ឃួង ស្រេង អភិបាល នៃគណៈអភិបាលរាជធានីភ្នំពេញ សហការជាមួយក្រសួងសុខាភិបាល សាងសង់មន្ទីរពេទ្យមួយកន្លែងទៀត លើផ្ទៃដីជាង ៧ ហិកតា ស្ថិតនៅក្នុងភូមិកប់ស្រូវធំ លើមហាវិថីឈ្នះឈ្នះ(កប់ស្រូវ) សង្កាត់គោករកា ខណ្ឌព្រែកព្នៅ រាជធានីភ្នំពេញ ដែលមានសមត្ថភាពទទួលអ្នកជំងឺប្រមាណជាង ១ ម៉ឺនគ្រែ ដើម្បីឆ្លើយតបទៅនឹងស្ថានភាពជាក់ស្ដែង លើតម្រូវការព្យាបាលអ្នកជំងឺរាតត្បាត មានឈ្មោះថា ៖ មណ្ឌលព្យាបាលជំងឺឆ្លងតេជោសន្តិភាពរាជធានីភ្នំពេញ៕

អត្ថបទ ៖ ស្រីរ័ត្ន