អាជ្ញាធរ​ខេត្តបន្ទាយមានជ័យ​ជួយសម្រួលសណ្ដាប់ ធ្នាប់​នៅតាមមណ្ឌលប្រឡង​បាក់ឌុប​

លោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យនៅថ្ងៃទី ៥ ខែធ្នូ ឆ្នាំ ២០២២នេះ បានណែនាំឲ្យ អាជ្ញាធរ​ក្រុងសិរីសោភ័ណធ្វើការសម្រួលសណ្តាប់ធ្នាប់ទីស្នាក់នៅអាហារកុំឲ្យឡើងថ្លៃផងដែរ ហើយកន្លែងថតចម្លងចម្លងឯកសារសំណៅចម្លើយវិញ្ញាសារប្រឡងជាដើម។

លោកអភិបាលខេត្តលើកឡើង​ក្នុងពេលចូលរួមបើកវិញ្ញាសារប្រឡងបាក់ឌុបនៅមណ្ឌលវិទ្យាល័យសិរីសោភ័ណ។

លោក អ៊ុំ រាត្រី និងមន្ត្រីពាក់ព័ន្ធជាច្រើនាក់បានធ្វើការបើក និងកាត់វិញ្ញាសារប្រឡងហើយបានធ្វើការផ្តាំផ្ញើរដល់បេក្ខជនប្រឡងទាំងអស់ត្រូវគោរពតាមគោលការណ៍ប្រឡងបាក់ឌុប ព្រោះឆ្នាំនេះ មានវិន័យតឹងរឹងដើម្បីធានាថា ការប្រឡងនេះមានស្តង់ដារគុណភាពខ្ពស់ ដូច្នេះ បេក្ខជន បេក្ខនារី ប្រឡង ត្រូវគោរពម៉ោងរួមទាំង វិន័យប្រឡង ហាមយកសំណៅឯកសារ ចម្លើយ ក៏ដូចឧបករណ៍ អេឡិចត្រូនិក ពោលគឺត្រូវគោរពតាមបទបញ្ជារ បទបញ្ញត្តិ ដែលក្រសួងបានដាក់ចេញ ការរឹតបន្តឹងនេះ នឹងធានាថា អ្នកចេះ គឺជាប់ ក្នុងករណីរកឃើញថាបេក្ខជននិងបេក្ខនារីបានប្រព្រឹត្តសកម្មភាពផ្ទុយនិងបទបញ្ញត្តិនិងកម្រិតវិន័យបេក្ខជននិងបេក្ខនារីនោះត្រូវបានកំណត់ឲ្យធ្លាក់ជាស្វ័យប្រវត្តិ។

លោក អ៊ុំ រាត្រីបានប្រាប់ឲ្យដឹងបន្តថាប្រឡងថ្ងៃទី១ រដ្ឋបាលខេត្ត មន្ទីរអប់រំយុវជននិងកីឡាខេត្ត និងមន្ទីរអង្គភាពពាក់ព័ន្ធបាន សហការជាមួយក្រសួង និងគណៈមេប្រយោគ គ្រប់កម្រិត អ្នកសង្កេតការណ៍អង្គភាពប្រឆាំងអំពើពុក រលួយដើម្បីរៀបចំដំណើរការមណ្ឌល សំណេរនៃការប្រឡងសញ្ញាប័ត្រមធ្យមសិក្សាក្នុងខេត្តនេះឲ្យបានលទ្ធផលល្អ និងមានប្រសិទ្ធភាពផងដែរ៕

អត្ថបទ៖ វ៉ាន់ ណាង