​ម្ហូប​ប្រចាំ​ត្រកូលខេត្ត​តាកែវ​មួយ​ទៀត ល្បី​​មិន​ចាញ់​បង្កង​ទឹក​សាប រហូត​ខេត្ត​ចង់​សង់​រូប​សំណាក​ឲ្យ​ថែម​ទៀត

ខេត្តតាកែវ ៖ ក្រៅពីបង្កងទឹកសាបដែលល្បីថាមានឱជារសឆ្ងាញ់ពិសារ សម្រាប់ខេត្តតាកែវវិញគឺនៅមានមុខម្ហូបពងទាកូនមួយទៀតដែលភ្ញៀវក្រៅស្រុកក៏ដូចជាភ្ញៀវនៅក្នុងស្រុកនិយមទទួលទាននិងសរសើរថាឆ្ងាញ់គ្រប់ៗគ្នា។

លោក អ៊ូច ភា អភិបាលនៃគណៈអភិបាលខេត្តតាកែវថ្លែងថា ពងទាកូនស្រែរនោង ជាផលិតផលកសិកម្មរបស់ខេត្តតាកែវ ដែលមានភាពល្បីល្បាញទូទាំងប្រទេស ថែមទាំងជាផលិផលសម្គាល់តំបន់ភូមិសាស្ត្រថែមទៀតផង។

លោកអភិបាលខេត្តបញ្ជាក់ថា ពងទាកូនស្រែរនោង គឺត្រូវបានផលិតឡើងដោយកសិករនៅឃុំស្រែរនោង ស្រុកត្រាំកក់ ខេត្តតាកែវ ដែលបច្ចុប្បន្នបានចងក្រងជាសហគមន៍ផលិតច្បាស់លាស់ មានការយកចិត្តទុកដាក់និងប្រើប្រាស់បច្ចេកទេសចិញ្ចឹមទាយកពងថែទាំតាមលក្ខណធម្មជាតិសុទ្ធសាធ ចាប់តាំងពីការផ្តល់ចំណីមេទា រហូតដល់ផលិតជាពងនិងបញ្ចេញលក់នៅលើទីផ្សារ។

បច្ចុប្បន្ននេះពងទាកូនស្រែរនោងត្រូវបានផ្គត់ផ្គងលើទីផ្សារទូទាំងប្រទេស ដោយបានចូលរួមបង្កើតការងារនិងចំណូលជាច្រើនព្រមទាំងលើកកម្ពស់កម្រិតជីវភាពកសិករនៅឃុំស្រែរនោងកាន់តែធូរធាឡើងជាលំដាប់។

ក្នុងកាសនោះដែរលោក អ៊ូច ភា ក៏បានបង្ហើបថា នៅទូទាំងខេត្តតាកែវមានមេទាចំនួន១ ៦១២ ៩៧០ក្បាល ចិញ្ចឹមជាលក្ខណៈគ្រួសារនិងមានកសិដ្ឋានចំនួន១៧២កន្លែង និងកន្លែងភ្ញាស់ពងទាចំនួន៧២កន្លែង។ ដោយឡែកសម្រាប់តម្លៃបោះដុំពងទាកូនវិញ នៅថ្ងៃទី០៧ ខែមករា ឆ្នាំ២០២១ នេះ អ្នកលក់បោះដុំម្នាក់នៅឃុំស្រែរនោងបានប្រាប់ថា គឺមានតម្លៃ ចាប់ពី៥០០រៀល ទៅ៦០០រៀលក្នុងមួយគ្រាប់៕

អត្ថបទ៖ វីរៈ