ព័ត៌មានជាតិ

សម្ដេចតេជោ ផ្ញើសាររំលែកទុក្ខជាមួយរដ្ឋាភិបាលវៀតណាម

បានផុស

៣ years មុន

នៅ

ថ្ងៃពុធ ២៨ តុលា ២០២០

ដោយ

សម្ដេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្ញើសារ លិខិតថ្លែងអំណរគុណ នាយករដ្ឋមន្ត្រី វៀតណាម ដែលបានផ្ញើសារចូលរួមសំដែងការព្រួយបារម្ភចំពោះកម្ពុជាដែលទទួលរងគ្រោះដោយជំនន់ទឹកភ្លៀង ។

ជាមួយគ្នានេះ សម្ដេចតេជោ នាយករដ្ឋមន្ត្រី ក៏បានចូលរួមសោកសង្រេងចំពោះការបាត់ បង់ជីវិតនិងបាត់ខ្លួនរបស់ប្រជាជនវៀតណាម ក្នុងគ្រោះធម្មជាតិថ្មីៗនេះ ផងដែរ។

ក្នុងសារលិខិតរបស់សម្ដេចតេជោ ផ្ញើទៅលោក ង្វៀង សួនហ្វុក កាលពីថ្ងៃទី ២៦ ខែតុលា ឆ្នាំ២០២០ មានខ្លឹមសារទាំងស្រុងថា «ខ្ញុំមានសេចក្ដីសោកសង្រេងយ៉ាងខ្លាំងដែលបានទទួលព័ត៌មានអំពីការបាត់បង់ជីវិតនិងការបាត់ខ្លួនប្រជាជនជាច្រើននាក់ ក៏ដូចជាការខូចខាតផលដំណាំនិងទ្រព្យសម្បត្តិធ្ងន់ធ្ងរនៅភាគកណ្ដាលនិងតំបន់ខ្ពង់រាបកណ្ដាល ជាពិសេសនៅខេត្តធឿធានហ្វេ និងខេត្តក្វាងជិ នៃប្រទេសវៀតណាម ដោយសារទឹកជំនន់និងការបាក់ដីដែលបង្កមកពីព្យុះលីនហ្វា និងណាងកា នាពេលថ្មីៗនេះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន បានបន្តថា «ក្នុងគ្រាដ៏លំបាកនិងសោកសៅនេះ តាងនាមរាជរដ្ឋាភិបាលនិងប្រជាជនកម្ពុជា ខ្ញុំសូមចូលរួមរំលែកទុក្ខយ៉ាងក្រៀមក្រំជូន ចំពោះឯកឧត្តម និងប្រជាជនវៀតណាម ជាពិសេសក្រុមគ្រួសារនៃសពនិងជនរងគ្រោះនៅក្នុងគ្រោះមហន្តរាយធម្មជាតិ ដ៏អាក្រក់នេះ»។

សម្ដេចនាយករដ្ឋមន្ត្រី បានបង្ហាញ ការជឿជាក់ថា ក្រោមការដឹកនាំដ៏ខ្លាំងក្លារបស់លោកនាយករដ្ឋមន្ត្រី ង្វៀង សួនហ្វុក ប្រទេសវៀតណាម នឹងបានប្រសើរឡើងវិញ ពីការខូចខាតដែលបង្កមកពីគ្រោះធម្ម ជាតិនៅក្នុងពេលឆាប់ៗខាងមុខនេះ។

គួររំលឹកថា កាលពីថ្ងៃទី១៨ ខែតុលា ឆ្នាំ២០២០ លោក ង្វៀង សួនហ្វុក នាយករដ្ឋមន្ត្រី វៀតណាម ផ្ញើសារលិខិតសួរសុខទុក្ខ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយសម្តែងការព្រួយបារម្ភចំពោះគ្រោះទឹកជំនន់នៅក្នុងប្រទេសកម្ពុជា។

ជាមួយគ្នានេះ លោកមានក្តីជឿជាក់មុតមាំថា ក្រោមការដឹកនាំ និងយកចិត្តទុកដាក់ខ្ពស់ពី សម្ដេចតេជោ នាយករដ្ឋមន្ត្រី ប្រជាជនកម្ពុជា នឹងជម្នះលើការលំបាកទាំងនេះ និងរកជីវភាពប្រក្រតីឡើងវិញ នាពេលឆាប់ៗដ៏ខ្លីខាងមុខ៕

អត្ថបទ ៖ ដោយៈណារី