ព័ត៌មានជាតិ

ទំនប់បង្អៀរទឹកព្រែកកំចាយ តម្លៃជាង ២ លានដុល្លារ បើកការដ្ឋានសាងសង់

បានផុស

២ years មុន

នៅ

ថ្ងៃអាទិត្យ ១១ ធ្នូ ២០២២

ដោយ

គម្រោងសាងសង់ទំនប់បង្ហៀរទឹកព្រែកកំចាយ ស្ថិតស្រុកទឹកឈូ ខេត្តកំពតដែលមានតម្លៃប្រមាណជាង ២លានដុល្លារអាមេរិកបានចាប់ផ្តើមបើកដំណើរការសាងសង់កាលពីថ្ងៃទី១០ខែធ្នូឆ្នាំ២០២២ ហើយគ្រោងបញ្ចប់នៅចុងខែមិថុនាឆ្នាំ២០២៣ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក Wang Tiefeng អគ្គនាយកក្រុមហ៊ុន ស៊ីណូហាយដ្រូកំចាយមានប្រសាសន៍ថា សំណង់ទំនប់បង្ហៀរនេះមានប្រវែង ៧៧ម៉ែត្រ មានកម្ពស់ ១,៨ម៉ែត្រ ទទឹងខ្នងទំនប់១,៥ម៉ែត្រ ជើងទេរ៥ម៉ែត្រ ជញ្ជាំងការពារច្រាំង ប្រវែង៥២ ម៉ែត្រ និងរបងការពារប្រវែង ៥២ម៉ែត្រ ព្រមទាំងផ្លូវសម្រាប់មច្ឆាឆ្លងកាត់ដែលមានទំហំ ១.៨៤៨ម៉ែតការ៉េ។

ក្រោយការសាងសង់បញ្ចប់ ទំនប់បង្ហូរនេះនឹងផ្ដល់នូវអត្ថប្រយោជន៍អាចរក្សាជាអាងស្តុកទឹកសម្រាប់បូមប្រើប្រាស់ប្រមាណ ១០ម៉ឺនម៉ែត្រគូបក្នុងមួយថ្ងៃ ដែលនឹងអាចកាត់បន្ថយស្ថានភាពខ្វះខាតទឹកនៃខេត្តកំពត និងបង្កើនសក្តានុពលនៃការអភិវឌ្ឍន៍ក៏ដូចជាជំរុញកំណើនជីវភាពប្រជាពលរដ្ឋនៅក្នុងខេត្តកំពតសម្រាប់ថ្ងៃអនាគត។

លោក អ៊ុ សុថា រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ថ្លែងនៅក្នុងពិធីបើកការដ្ឋានសាងសង់ទំនប់បង្ហៀរទឹកព្រែកំចាយនោះថា គម្រោងសាងសង់ទំនប់បង្ហៀរទឹកព្រែកកំចាយនេះ ផ្តើមចេញពីការខិតខំប្រឹងប្រែងរបស់រាជរដ្ឋាភិបាល និងអនុសាសន៍ណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ដែលបានថ្លែងក្នុងឱកាសអញ្ជើញជាអធិបតីភាពដ៏ខ្ពង់ខ្ពស់នៅក្នុងពិធីសម្ពោធដាក់ឱ្យដំណើរការជាផ្លូវការប្រព័ន្ធផ្គត់ផ្គង់ទឹកស្អាតខេត្តកំពត កាលពីថ្ងៃទី២ ខែមេសា ឆ្នាំ២០១៩ ដោយបានគាំទ្រនូវគំនិតផ្តួចផ្តើមរបស់ លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម ដែលបានលើកឡើងនូវគម្រោងសាងសង់ទំនប់បង្ហៀរទឹកនេះ។

លោកបានបន្តថា ទំបន់នេះក្រុមហ៊ុនគ្រោងបញ្ចប់ការសាងសង់នៅថ្ងៃទី៣០ខែមិថុនា ឆ្នាំ២០២៣ ខាងមុខនេះ ដោយគ្រោងចំណាយថវិកាសាងសង់សរុប ២លាន១ម៉ឺនដុល្លារអាមេរិក។

លោករដ្ឋលេខាធិការបានបន្តថា ទំនប់បង្ហៀរនេះមានប្រយោជន៍ច្រើន អាចជួយទប់ទឹកប្រៃមិនឱ្យហូរចូលព្រែកដែលធ្វើឱ្យខូចទឹកសាប និងអាចរក្សាជាអាងស្តុកទឹកសាប ដែលអាចបូមប្រើប្រាស់បានប្រមាណ ១សែនម៉ែត្រត្រីគុណក្នុង១ថ្ងៃ និងអាចផ្គត់ផ្គង់ទឹក ២៤/២៤ម៉ោង៕

អត្ថបទ៖ សំអឿន

Related Topics:ខេត្តកំពត