ព័ត៌មានជាតិ

លោកគួច ចំរើន ប្ដេជ្ញាថែរក្សាសួនកោងកាងសាងស្នេហ៍ថ្មីឱ្យស្ថិតស្ថេរយូរអង្វែង

បានផុស

២ years មុន

នៅ

ថ្ងៃចន្ទ ១២ ធ្នូ ២០២២

ដោយ

លោកគួច ចំរើន អភិបាលនៃគណៈអភិបាលខេត្តព្រះសីហនុបានប្ដេជ្ញាចិត្តនឹងថែរក្សាសួនកោងកាងសាងស្នេហ៍ ដែលទើបបង្កើតឡើងឱ្យនៅស្ថិតស្ថេរយូរអង្វែង និងប្រែក្លាយតំបន់នេះទៅជាតំបន់អភិរក្សមួយដ៏សំខាន់ រួមចំណែករក្សាតុល្យភាពបរិយាកាស និងលើកកម្ពស់សេដ្ឋកិច្ចមូលដ្ឋានតាមរយៈការរៀបចំអេកូទេសចរណ៍ធម្មជាតិផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងឱកាសដែលគណៈប្រតិភូក្លឹបឆ្នេរសមុទ្រអញ្ជើញមកពីជាង ២០ បានចូលរួមដាំដើមកោងកាងប្រមាណជាង ៣ ពាន់ដើមនាខេត្តព្រះសីហនុ កាលពីថ្ងៃទី ១១ ខែធ្នូ ម្សិលមិញនេះ ព្រមទាំងបានប្រសិទ្ធនាមថា «សួនកោងកាងសាងស្នេហ៍»។

លោកគួច ចំរើន បានគូសបញ្ជាក់ថា ព្រៃកោងកាងគឺដើរតួនាទីយ៉ាងសំខាន់សម្រាប់ទ្រទ្រង់ដល់ប្រព័ន្ធបរិស្ថាន និងជារបៀងតភ្ជាប់ប្រព័ន្ធអេកូឡូស៊ីរវាងដំបន់ដីគោក ឆ្នេរ និងសមុទ្រ។ ដើមកោងកាងដែលបានដាំនាពេលនេះ ជារុក្ខជាតិដុះតាមតំបន់ឆ្នេរ ឬតំបន់ទឹកប្រៃលាយសាប ដែលត្រូវបានគេរកឃើញនៅតាមឆ្នេរសមុទ្រត្រូពិក ជាពិសេសនៅតំបន់មហាសមុទ្រឥណ្ឌាខាងលិច។

អភិបាលខេត្តព្រះសីហនុបានលើកពីគុណប្រយោជន៍នៃព្រៃកោងកាងជារបាំងការពារធម្មជាតិដូចជា ខ្យល់ព្យុះ ការបាក់ឆ្នេរសមុទ្រ ការហូរច្រោះឆ្នេរ ការកើនឡើងកម្ពស់ទឹកសមុទ្រ និងការរក្សាទុកកាបូន ដែលរួមចំណែកក្នុងការឆ្លើយតបនឹងការប្រែប្រួលអាកាសធាតុ។

លោកបន្តថា ការដាំដើមកោងកាង ពិតជាមានសារៈសំខាន់ក្នុងការការពារ និងអភិរក្សធនធានធម្មជាតិ ព្រមទាំងលើកស្ទួយជីវភាពរស់នៅរបស់សហគមន៍មូលដ្ឋាន ដួចទិសស្លោក «ព្រៃឈើដុះយើងរស់ ព្រៃឈើល្អយើងមានបាន កាប់ព្រៃឈើក្ររហេមរហាម ឬកាប់ព្រៃកោងកាង បំផ្លាញខ្លួនឯង»។

មួយវិញទៀត ព្រៃកោងកាង ជាកន្លែងរក្សាដែនជម្រក ជាកន្លែងបង្កាត់ពូជ ប្រភពមេ ពូជនៃធម្មជាតិ និងផ្ដល់អត្ថប្រយោជន៍ជាច្រើនដល់មនុស្ស តាមរយៈការផ្ដល់ជាប្រភពអាហារ និងឱសថ បុរាណផងដែរ។