តើស្ត្រីឆ្នើមរូបណាខ្លះ កំពុងកាន់តំណែងជារដ្ឋលេខាធិការក្រសួងការបរទេសកម្ពុជា?

ក្របខណ្ឌនៃក្រសួងការបរទេស និងសហប្រតិបត្តិការអន្តរជាតិ ដែលជាសេនាធិការរបស់រាជរដ្ឋាភិបាលកម្ពុជាលើកិច្ចការទូត និងទំនាក់ទំនងអន្តរជាតិ គេសង្កេតឃើញថា មានស្ត្រីពូកែ និងឆ្នើមកំពុងកាន់តំណែងតួនាទីជាច្រើនគ្រប់ជាន់ថ្នាក់នៅក្នុងក្រសួងនេះ។ ជាក់ស្ដែង មានស្ត្រី ៤រូបក៏កំពុងកាន់តំណែងជារដ្ឋលេខាធិការក្រសួងការបរទេសដែលសុទ្ធសឹងតែជាស្ត្រីមាននូវសមត្ថភាពខ្ពស់ ចំណេះដឹងជ្រៅជ្រះ និងបទពិសោធការងារយ៉ាងជោគជាំលើកិច្ចការទូត និងទំនាក់ទំនងអន្តរជាតិ។ តើស្រ្តីឆ្នើមទាំង៤រូបនេះ គឺជានរណា?

១/ លោកស្រី សឿង រដ្ឋចាវី

លោកស្រី សឿង រដ្ឋចាវី ជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។ ស្ត្រីវ័យ ៦៤ឆ្នាំរូបនេះ ត្រូវបានគេចាត់ទុកថា ជាអ្នកការទូតឆ្នើមរបស់កម្ពុជាដែលបានបំពេញកិច្ចការប្រកបដោយឆន្ទៈ មានសមត្ថភាពខ្ពស់ និងពោរពេញដោយបទពិសោធតាមរយៈមុខតំណែង និងតួនាទីជាបន្តបន្ទាប់របស់លោកស្រីនៅក្នុងវិស័យការទូត និងទំនាក់ទំនងអន្តរជាតិ។ លោកស្រី សឿង រដ្ឋចាវី អាចប្រើប្រាស់ភាសាបរទេសរហូតទៅដល់ ៤ភាសា ដូចជា៖ អង់គ្លេស បារាំង រុស្ស៊ី និងអេស្បាញ។ អ្នកការទូតស្រ្តីរូបនេះ ជាអតីតនិស្សិតកម្ពុជាដែលទទួលបានអាហារូបករណ៍ទៅបន្តការសិក្សានៅទីក្រុងមូស្គូ ប្រទេសរុស្ស៊ី ដែលបានចំណាយពេលសិក្សាប្រមាណ ១៤ឆ្នាំ ដោយលោកស្រី បានចប់ថ្នាក់អនុបណ្ឌិតផ្នែកទំនាក់ទំនងអន្តរជាតិ និងចប់ថ្នាក់បណ្ឌិតវិទ្យាសាស្ត្រនយោបាយ។

លោកស្រី សឿង រដ្ឋចាវី បានចាប់ផ្ដើមចូលបម្រើការនៅក្រសួងការបរទេស និងសហប្រតិបត្តិការអន្តរជាតិ ចាប់តាំងពីឆ្នាំ១៩៩៨ ដែលមានតួនាទីជាប្រធានការិយាល័យ។ លោកស្រីក៏ធ្លាប់ធ្វើជាអគ្គលេខាធិការរងអាស៊ានអាណត្តិកាងារឆ្នាំ ២០០៦-២០០៩ ធ្លាប់ធ្វើជាឯកអគ្គរាជទូតកម្ពុជាប្រចាំចក្រភពអង់គ្លេស និងធ្លាប់ធ្វើជាទីប្រឹក្សាលោកឧបនាយករដ្ឋមន្ត្រី ហោ ណាំហុង។

២/ លោកស្រី អ៊ាត សោភា

លោកស្រី អ៊ាត សោភា ជារដ្ឋលេខាធិការ និងជាឧត្តមមន្រ្តីអាស៊ានរបស់កម្ពុជាដែលបានចូលរួមដឹកនាំកិច្ចប្រជុំឧត្តមមន្រ្តីអាស៊ាន មុនពេលឈានដល់កិច្ចប្រជុំរដ្ឋមន្រ្តីការបរទេសអាស៊ាន និងកិច្ចប្រជុំកំពូលអាស៊ាន កាលពីអំឡុងពេលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ាន កាលពីខែវិច្ឆិកា ឆ្នាំ២០២២ កន្លងទៅនេះ។

មុនកាន់តំណែងជាន់ខ្ពស់នៅក្រសួងការបរទេស លោកស្រី អ៊ាត សោភា បានផ្ដើមចូលបម្រើការងារជាមន្ត្រីការិយាល័យព័ត៌មាននៃក្រសួងការបរទេស តាំងពីឆ្នាំ១៩៨៥។ ខណៈលោកស្រី ក៏ធ្លាប់កាន់តំណែងជាអនុរដ្ឋលេខាធិការ ធ្លាប់បំពេញតួនាទីជាឯកអគ្គរាជទូតកម្ពុជាប្រចាំនៅប្រទេសថៃរយៈពេលប្រមាណ ៣ឆ្នាំ(២០១៤-២០១៧) និងជានាយកខុទ្ទកាល័យអតីតរដ្ឋមន្ត្រីក្រសួងការបរទេស លោក ហោ ណាំហុង។

ចំពោះការសិក្សាលោកស្រី អ៊ាត សោភា បានទទួលការបណ្ដុះបណ្ដាល និងអប់រំទាំងនៅកម្ពុជា ទាំងនៅឥណ្ឌា និងនៅអូស្ត្រាលី។ លោកស្រីទទួលបានបរិញ្ញាបត្រផ្នែកភាសាអង់គ្លេស នៅសាកលវិទ្យាល័យJawaharlal Nehru ឥណ្ឌា និងបញ្ចប់វគ្គបណ្ដុះបណ្ដាលជំនាញការទូតនៅក្រសួងការបរទេសកម្ពុជា វិញ្ញាបនបត្រថ្នាក់ក្រោយឧត្តមសិក្សាផ្នែកច្បាប់អន្តរជាតិ និងការទូត នៃបណ្ឌិតសភាច្បាប់អន្តរជាតិ និងការទូតឥណ្ឌា និងបានបញ្ចប់សញ្ញាបត្រអនុបណ្ឌិតនយោបាយ និងរដ្ឋបាលសាធារណៈ នៅសាកលវិទ្យាល័យ Flinders ប្រទេសអូស្ត្រាលី។

៣/ លោកស្រី ទួត បញ្ញា

លោកស្រី ទួត បញ្ញា ជារដ្ឋលេខាធិការក្រសួងការបរទេសទទួលបន្ទុកកិច្ចការអាស៊ីអាគ្នេយ៍ បន្ទាប់ពីលោកស្រីបានចូលបម្រើការងារជាមន្ត្រីនៃនាយកដ្ឋានសារព័ត៌មានក្រសួងការបរទេស តាំងពីឆ្នាំ១៩៨៣។ មុនក្លាយជារដ្ឋលេខាធិការក្រសួងការបរទេស លោកស្រី ធ្លាប់ធ្វើជាទីប្រឹក្សាក្រសួងការបរទេស ជាអនុ​រដ្ឋលេខាធិការ ទទួលបន្ទុកកិច្ចសហប្រតិបត្តិការអនុតំបន់ និងកិច្ចប្រជុំ​​អាស៊ី-អឺរ៉ុប និងជាឯកអគ្គរាជទូត​កម្ពុជាប្រចាំប្រទេសហ្វីលីពីន។ លោកស្រី ទួត បញ្ញា បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់នៃបណ្ឌិតសភាការទូត ប្រទេសរុស្សុី។

៤/ លោកស្រី យ៉ិនទៀង ពុទ្ធិរស្មី

មុនមកកាន់ជារដ្ឋលេខាធិការក្រសួងការបរទេស លោកស្រី យ៉ិនទៀង ពុទ្ធិរស្មី ជាមន្ត្រីក្របខណ្ឌអង្គភាពប្រឆាំងអំពើពុករលួយ។ ជាមន្ត្រីនៃអង្គភាពប្រឆាំងអំពើពុករលួយ លោកស្រីធ្លាប់មានតួនាទីអនុប្រធាននាយកដ្ឋាននៃលេខាធិការដ្ឋាននៃគណៈកម្មាធិការជាតិប្រឆាំងភេរវកម្ម និងជានាយកខុទ្ទកាល័យលោកទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ។ លោកស្រី យ៉ិនទៀង ពុទ្ធិរស្មី បានបញ្ចប់ការសិក្សាថ្នាក់បរិញ្ញាបត្រផ្នែកគ្រប់គ្រងពាណិជ្ជកម្មអន្តរជាតិនៃ សាកលវិទ្យាល័យមេគង្គកម្ពុជា និងថ្នាក់បរិញ្ញាបត្រជាន់ខ្ពស់ពាណិជ្ជសាស្រ្តនៅសាកលវិទ្យាល័យ IIC នៃបច្ចេកវិទ្យា៕

ដោយ៖ ធឿន វ៉ាន់សុង