​ការបង្ក្រាបបទល្មើសនេសាទមានប្រសិទ្ធភាព​ រំពឹងកំណើនទិន្នផលត្រីទឹកសាប​

លោក ពុំ សុថា អគ្គនាយករដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ​បានថ្លែងថា ទិន្ន​ផលនេសាទត្រីទឹកសាបនារដូវនេសាទឆ្នាំនេះ​រំពឹងកើនឡើងច្រើនជាងឆ្នាំមុន​ ដោយសារកម្ពស់ទឹកឆ្នាំនេះមានភាពល្អប្រសើរ​ និងការបង្ក្រាបបទល្មើសនេសាទក្នុងបឹងទន្លេសាប​មានប្រសិទ្ធភាព។

លោក ពុំ សុថាថ្លែងថា «យើងចាំមើលទាំងអស់គ្នា ហើយអ្នកនេសាទក៏គិតចឹងដែរ​ឆ្នាំ​នេះ​ ពេលទឹកជន់អ្នកនេសាទរកត្រីបានរដូវនេសាទឆ្នាំនេះបានបើករួចហើយ ប៉ុន្តែកម្ពស់ទឹក​នៅខ្ពស់​ត្រីដាយ​មិនទាន់ត្រូវ»​។

​​របាយការណ៍របស់ក្រសួងកសិកម្ម រុក្ខា ប្រមាញ់ និងនេសាទ ប្រចាំខែតុលា បង្ហាញថា ដាយត្រី​សម្រេច​បានក្នុងខែតុលា ចំនួន ២០ តោន សរុបរយៈពេល ១០ ខែ ចំនួន ៦៧០ តោន ខណៈ​នេសាទ​គ្រួសារ​សម្រេចបានជាង ១ សែនតោន (១៦៦ ៤០០)។

ទិន្នន័យពីក្រសួងកសិកម្មបង្ហាញថា ឆ្នាំ ២០២១ ​កម្ពុជាទទួលបានផលនេសាទ​ទឹក​សាបសម្រេចបានជិត ៤ សែនតោន៕

អត្ថបទ៖ ឡេង ដេត