ក្រសួងអប់រំនឹងចាប់ផ្តើមដំណើរការស្រង់ពិន្ទុសន្លឹកកិច្ចការប្រឡងនៅថ្ងៃទី១៦ធ្នូ

ក្រសួងអប់រំយុវជននិងកីឡានឹងចាប់ផ្តើមដំណើរការស្រង់ពិន្ទុសន្លឹកកិច្ចការប្រឡងនៅថ្ងៃទី១៦ ខែធ្នូ ឆ្នាំ២០២២បន្ទាប់ពីបានបញ្ចប់ទាំងស្រុងនូវដំណើរការកំណែសន្លឹកកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិរួចមក។

លោក រស់សុវាចា អ្នកនាំពាក្យក្រសួងអប់រំយុវជននិងកីឡាបានមានប្រសាសន៍នៅព្រឹកថ្ងៃទី១៥ធ្នូនេះថា យោងតាមកម្មវិធីការងារប្រឡងបាក់ឌុបក្រសួងបានដំណើរការកំណកែសន្លឹកកិច្ចការប្រឡងបាក់ឌុបចាប់ពីថ្ងៃទី១១ដល់ថ្ងៃទី១៤ធ្នូឆ្នាំ២០២២ត្រូវ​បាន​បញ្ចប់​ទាំង​ស្រុង​ក្រោម​ការ​បំពេញ​ភារកិច្ច​យ៉ាងសកម្ម និង​ទំនួល​ខុស​ត្រូវ​ខ្ពស់​ពី​ប្រធាន អនុ​ប្រធាន​មណ្ឌល​កំណែគណៈកម្មការ​ទាំងអស់ព្រម​ទាំង​ការ​ចូលរួម​សង្កេត​ការណ៍​ជា​ប្រចាំ​ពី​មន្ត្រី​អង្គភាព​ប្រឆាំង​អំពើ​ពុករលួយ​។

លោកបានបន្តថា បន្ទាប់​ពី​បញ្ចប់​ដំណើរ​ការ​កំណែ ប្រធានអនុ​ប្រធាន​មណ្ឌល​ទាំង​អស់ បាន​ដឹក​សន្លឹក MCS និង​ឯកសារ​ផ្សេងៗ​មក​រក្សាទុក​នៅ​នាយកដ្ឋានកិច្ចការប្រឡងដើម្បី​ចាប់​ផ្ដើម​រៀប​ចំ​ដំណើរ​ការ​ស្រង់ បូក​ពិន្ទុ​ដោយ​កុំព្យូទ័រ។ ដោយឡែកសន្លឹក​កិច្ចការ​របស់​បេក្ខជនត្រូវ​បាន​ដឹក​មករក្សា​ទុក​នៅអគាររដ្ឋបាលក្រសួងអប់រំ យុវជន និងកីឡា(ជិត​សាលា​បឋមសិក្សាចៅពញ្ញាហុក) ។ បន្ទាប់មកនៅរសៀលថ្ងៃទី១៥ធ្នូមានការប្រជុំណែនាំគណៈកម្មការស្រង់បូកពិន្ទុដោយកុំព្យូទ័រនិងគណៈកម្មការផ្ទៀងផ្ទាត់នៅសាលប្រជុំវិទ្យាស្ថានគរុកោសល្យរាជធានីភ្នំពេញ។ លោកបានបន្តទៀតថាចាប់ពីថ្ងៃទី១៦ ដល់ថ្ងៃទី២៥ធ្នូក្រសួងនឹងចាប់ផ្តើមដំណើរការស្រង់ពិន្ទុដោយកុំព្យូរទ័រនិងពិនិត្យផ្ទៀងផ្ទាត់ពិន្ទុនិងថ្ងៃទី​២៦​ធ្នូថ្នាក់ដឹកនាំក្រសួងប្រជុំសម្រេចលទ្ធផលប្រឡងបាក់ឌុបនិងថ្ងៃទី២៧ ខែធ្នូពេលរសៀលប្រកាសលទ្ធផលប្រឡងសម្រាប់​នៅ រាជធានីភ្នំពេញ និងខេត្តកណ្តាល និងនៅថ្ងៃទី២៨ ខែធ្នូ ឆ្នាំ២០២២ សម្រាប់ខេត្ត ផ្សេងៗនៅទូទាំង ប្រទេស។

គួរបញ្ជាក់ថាឆ្នាំនេះក្រសួងអប់រំយុវជននិងកីឡាបានរៀបចំប្រឡងសញ្ញាបត្របាក់ឌុបនៅថ្ងៃទី៥និងទី៦ធ្នូដោយមានបេក្ខ​ជនចូលរួមប្រឡងសរុបចំនួន១២៨ ១៣៥នាក់ស្រី៦៨៧៧១នាក់មាន២២១មណ្ឌលដែលត្រូវជា៥១៧៤បន្ទប់និងមានការចូលរួមដោយគណៈមេប្រយោគនិងគណៈកម្មការនានាចូលរួមក្នុងដំណើរនោះប្រឡងសរុបចំនួន១៧២៤០នាក់ជំនួយការអប្បមាទដែលជាគរុសិស្ស និងគរុនិស្សិត ចំនួន២៧៥៦នាក់ព្រមទាំងចូលរួមសង្កេតការណ៍ពីអង្គភាពប្រឆាំងអំពើពុករលួយចំនួន៣៥០នាក់និងអ្នកសង្កេតការណ៍រាជធានីខេត្តចំនួន២ ៧០០នាក់៕

អត្ថបទ៖ សំអឿន