គម្រោងសាងសង់វិមានឯករាជ្យ និងផ្សាររាត្រី​នៅបាត់ដំបង​ប្រើពេលជាង ៦ ខែ

គម្រោងសាងសង់វិមានឯករាជ្យ មានផ្ទៃដីសរុបចំនួន ៩៦២ម៉ែត្រ អង្កត់ផ្ចិត ៣៥ម៉ែត្រ និងកម្ពស់ ២២,២៣ម៉ែត្រ និងគម្រោងផ្សាររាត្រីក្រុងបាត់ដំបង សាងសង់ឡើងនៅលើផ្ទៃដីប្រមាណ ២.៤២៥​ម៉ែត្រការ៉េ​គ្រោងប្រើរយៈពេលជាង ៦ ខែ សាងសង់ឲ្យរួចរាល់នាពាក់កណ្ដាលឆ្នាំក្រោយ បន្ទាប់​ពីបើកការដ្ឋានសាងសង់​កាលពីថ្ងៃទី ១៥ ខែធ្នូ ឆ្នាំ ២០២២ ម្សិលមិញ។

​លោក សុខ លូ អភិបាល នៃគណៈអភិបាលខេត្តបាត់ដំបងបានថ្លែងថា ​គម្រោងសាង​សង់វិមាន​ឯករាជ្យនេះ មានផ្ទៃដីសរុបចំនួន ៩៦២ម៉ែត្រ មានខឿនទម្របាតក្រោមដែលមានអង្កត់ផ្ចិត ៣៥ម៉ែត្រ និងកម្ពស់ ២២,២៣ម៉ែត្រ មានអាងបាញ់ទឹក៤ មានកម្ពស់ ០,៨ម៉ែត្រ អមជុំវិញវិមានឯករាជ្យ។

សូមជំរាបថាផងដែរថា សម្រាប់គម្រោងសួនសម្ដេចក្រឡាហោមវិមានឯករាជ្យធ្វើនៅលើផ្ទៃដីប្រមាណ ១៣.៦០០ម៉ែត្រ ចែកជា ៥តំបន់ ផ្សេងៗពីគ្នាមានដូចជាទី១-តំបន់នាគបាញ់ទឹក តំបន់រីករាយ (កន្លែងថតរូប), ទី២-តំបន់សន្តិភាពស្ងប់ស្ងាត់ និងសុខសាន្ត, ទី៣-តំបន់រំលឹកប្រវត្តិសាស្ត្រ, ទី៤-តំបន់នាគសន្តិភាព ឬតំបន់រំលឹកគុណសន្តិភាព និងទី៥- តំបន់រង់ចាំ។

ដោយឡែក គម្រោងផ្សាររាត្រីក្រុងបាត់ដំបង សាងសង់ឡើងនៅលើផ្ទៃដីប្រមាណ ២.៤២៥​ម៉ែត្រ​ការ៉េ មានចម្ងាយប្រមាណ ៥០០ម៉ែត ពីទីតាំងវិមានឯករាជ្យ។

ផ្សាររាត្រីនេះ មានទ្វារចេញ​ចូលចំនួន​៣ ទ្វារធំមួយ និងទ្វារតូចពីរ ព្រមទាំងមានសួនផ្កានៅចំកណ្តាល ដែលមានផ្លូវដើរទៅមក ព្រមទាំង​មានកន្លែងអង្គុយសម្រាប់ញ៉ាំអាហារផងដែរ។

គម្រោងទាំង៣ខាងលើ គឺគ្រោងសាងសង់រយៈពេល ៦ខែកន្លះ បន្ទាប់ពីការបញ្ចុះ​បឋមសិលា​សាងសង់​ជាផ្លូវការ នាថ្ងៃទី១៥ ខែធ្នូ ឆ្នាំ២០២២នេះទៅ នឹងគ្រោងបញ្ចប់នាថ្ងៃទី៣០ ខែមិថុនា​ឆ្នាំ២០២៣ ខាងមុខ៕

អត្ថបទ៖ ឡេង ដេត