ពលរដ្ឋសំណូមពរអាជ្ញាធរពាក់ព័ន្ធជួសជុលផ្លូវវាងក្រុងកំពត ខណៈកំពុងខូចខ្លាំង

នៅថ្ងៃទី១៩ ខែធ្នូ ឆ្នាំ២០២២នេះប្រជាពលរដ្ឋរស់នៅភូមិត្រពាំងធំ ឃុំត្រពាំងធំ ស្រុកទឹកឈូ បានស្នើសុំដល់អាជ្ញាធរខេត្តកំពត ជួយជួសជុលស្ថាបនាផ្លូវវាងក្រុងកំពតមួយខ្សែ ដែលកំពុងខូចខាតខ្លាំង។

បើតាមការឲ្យដឹងពីប្រជាពលរដ្ឋ ដែលរស់នៅតាមសងខាងដងផ្លូវវាងក្រុងកំពតមួយខ្សែនេះបានឲ្យដឹងថា មូលហេតុដែលបណ្ដាលឲ្យផ្លូវនេះខូចខាតយ៉ាងធ្ងន់ធ្ងរបែបនេះ មកពីរថយន្តបែនដឹកដី ដឹកថ្ម បើកបរនិងធ្វើដំណើតាមផ្លូវនេះ រហូតដល់ផ្លូវថ្នល់ខូចខាត់កាន់តែខ្លាំង ក៏នៅតែបើកលឿនដែរ។

ពលរដ្ឋរស់នៅតាមដងផ្លូវនេះបានបន្តទៀតថា ដោយឃើញអភិបាលខេត្តឡើងថ្មីជាងមួយឆ្នាំមកនេះ លោកមានការយកចិត្តទុកដាក់ស្ថាបនាហេដ្ឋារចនាសម្ព័នផ្លូវក្នុងខេត្ត ដូច្នេះពួកគាត់ស្នើសុំដល់ឯកឧត្តម ម៉ៅ ធនិន អភិបាលខេត្តកំពតមេត្តាជួយជួសជុល ស្ថាបនាផ្លូងវាងក្រុងកំពតមួយខ្សែនេះវិញ ដើម្បីសម្រួលដល់ការធ្វើដំណើរ និងដឹកកសិផលរបស់ពួកគាត់ផង។

បើយោងតាមការឲ្យដឹងពីនាយករដ្ឋបាលខេត្តកំពត បានឲ្យដឹងថា ផ្លូវវាងក្រុងកំពតមួយខ្សែនេះ ដែលស្ថិតនៅក្នុងភូមិត្រពាំងធំ ឃុំត្រពាំងធំ ស្រុកទឹកឈូ ជាផ្លូវគម្រោងរបស់ក្រសួងសាធារណៈការនិងដឹកជញ្ជូន និងធ្វើកាជួសជុលផ្លូវវាងក្រុងកំពតនេះឡើងវិញនាពេលខាងមុខនេះហើយ ព្រោះផ្លូវវាងក្រុងកំពតនេះបានតភ្ជាប់ទៅផ្លូវជាតិលេខ ៣៣ និងបានតភ្ជាប់ទៅផ្លូវជាតិលេខ៣ និងទៅរាជធានីភ្នំពេញផងដែរ។

បើទោះបីជាយ៉ាងណា ប្រជាពលរដ្ឋរស់នៅតាមបណ្ដោយដងផ្លូវនេះ បានរអ៊ូរទាំថា ផ្លូវនេះមិនឃើញមានការជួសជុល​យូរមកហើយ ដោយមានរថយន្ដដឹកដី ដឹកថ្ម ជារៀងរាល់ថ្ងៃហុយខ្លាំងណាស់នៅខែប្រាំងនេះ ផ្ទះរបស់ពួកគាត់ស្ទើរតែមិនហ៊ានបើកទ្វារទេ ពិព្រោះដីហុយពេលឡានបើកឆ្លងកាត់៕

អត្ថបទ៖ សឹង រ៉ាត់