ព័ត៌មានជាតិ

អគារក្រសួងដែនដីថ្មីសង់ជិតរួច ដាំដើមត្នោត ២៩ ដើម លម្អបន្ថែមទៀតជាអត្តសញ្ញាណជាតិ

បានផុស

៤ years មុន

នៅ

ថ្ងៃសុក្រ ៨ មករា ២០២១

ដោយ

អគារទីស្តីការក្រសួងដែនដី នគរូបនីយកម្ម និងសំណង់ថ្មី ដែលមានទីតាំងនៅខណ្ឌសែនសុខ អាចសាងសង់រួចរាល់ទាំងស្រុងនៅអំឡុងខែ មេសា ឆ្នាំ២០២១នេះ។ សំណង់អគារថ្មីមានកម្ពស់ ៥ ជាន់នេះ ក្រៅពីការរចនាម៉ូតជាលក្ខណៈខ្មែរ ក៏មានការគិតគូរពីសោភណភាព ដោយមានការដាំលម្អបន្ថែមដោយដើមត្នោតរាប់សិបដើមជាអត្តសញ្ញាណជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម សេង ឡូត អ្នកនាំពាក្យក្រសួងដែនដី នគរូបនីយកម្ម និងសំណង់បានប្រាប់កម្ពុជាថ្មីនៅព្រឹកនេះថា ក្រោយការបើកការដ្ឋានជិតមួយឆ្នាំ សំណង់អគារទីស្តីការក្រសួងដែនដី នគរូបនីយកម្ម និងសំណង់ អាចរួចរាល់ទាំងស្រុងនៅអំឡុងខែ មេសា ឆ្នាំ២០២១ នេះ។ អគារទីស្តីការក្រសួងថ្មីរចនាបថលក្ខណៈជាខ្មែរ លម្អដោយស្ថាបត្យកម្មបុរាណស្ទើរគ្រប់ជ្រុងនៃអគារ។

ឯកឧត្តមបន្តថា ក្រៅពីការគិតគូរពីការឌីហ្សាញ នៅបរិវេណខាងមុខអគារក៏នឹងមានការដាំដើមត្នោត ២៩ ដើម លម្អបង្កើនសោភណភាពថែមទៀត។

បើតាមឯកឧត្តម សេង ឡូត មកដល់ពេលនេះដើមត្នោត ១៤ ដើម បានដាំរួចរាល់ និងនៅសល់ ១៥ ដើមទៀតនឹងបញ្ចប់នៅពេលឆាប់ៗខាងមុខនេះ។

អគារក្រសួងដែនដីថ្មី មានទីតាំងស្ថិតនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ សាងសង់នៅលើផ្ទៃដីទំហំ ៣ហិកតា មានភាពធំទូលាយបង្កលក្ខណៈងាយស្រួលដល់ការបម្រើការងាររបស់មន្រ្តីរាជការ និងការមកទទួលសេវាកម្មពីប្រជាពលរដ្ឋ។

ពាក់ព័ន្ធអគារទីស្តីការក្រសួងរៀបចំដែនដី នគរូបនីយកម្ម និងសំណង់ ដែលស្ថិតនៅលើមហាវិថីព្រះមុនីវង្ស កាលពីថ្ងៃទី ០៤ ខែមករា ឆ្នាំ២០២១ ទីស្តីការគណៈរដ្ឋមន្រ្តីបានចេញសេចក្តីជូនដំណឹង សម្រេចប្រគល់អគារទីស្តីការក្រសួងរៀបចំដែនដី នគរូបនីយកម្ម និងសំណង់ ដែលស្ថិតនៅលើមហាវិថីព្រះមុនីវង្ស ជូនក្រសួងអភិវឌ្ឍន៍ជនបទនៅពេលទីស្តីការក្រសួងថ្មីសាងសង់រួចរាល់ទាំងស្រុងនៅពេលឆាប់ៗខាងមុខនេះ៕