លោក ហឿន សំនៀង ៖ យុវជនគួរតែចូលរួមក្នុងការងារសង្គមឱ្យបានច្រើន

យុវជនគួរតែចូលរួមក្នុងការងារសង្គមឱ្យបានច្រើនដើម្បីផ្សារភ្ជាប់ខ្លួនជាមួយនឹងសង្គម ​ក្នុងន័យបណ្តុះចក្ខុវិស័យកាន់តែទូលំទូលាយ ចូលរួមលើកស្ទួយអភិវឌ្ឍនប្រទេសជាតិ។​
លោក ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន លើកឡើងបែបនេះ នៅក្នុងបទពិភាក្សា របស់កម្មវិធីដែលចំឡើងដោយកម្ពុជាថ្មី នៅព្រឹកថ្ងៃទី២៣ធ្នូនេះ។

បើតាមលោក ហឿន​ សំនៀង ការចូលរួមសកម្មភាពសហគមន៍ គឺអាចជួយឱ្យយុវជន​ទទួលបានព័ត៌មានច្រើន បានយល់ និងបានដឹងច្បាស់ ពីចំណុចខ្វះខាត និងតម្រូវការរបស់សង្គមជាតិ ហើយមិនងាយចាញ់បោក​មនោគមជនមួយចំនួន។

ក្នុងនោះ​ នាយកវិទ្យាស្ថានតេជោសែន សាធារណការ និងដឹកជញ្ជូនរូបនេះ ក៏បានលើកឡើងពីកត្តាអ្នកចំនួន ដែលចូលចិត្តយកសង្គមជាតិខ្លួន ទៅប្រៀបធៀបនឹងសង្គមជាតិប្រទេសគេ ដោយមិនបានសិក្សា និងយល់ច្បាស់ពីតថភាពជាក់ស្តែង។ លោកមានប្រសាសន៍ណែនាំ ​”មិនត្រូវប្រកួតជាមួយអ្នកដទៃ នូវអ្វីដែលយើងគ្មាននោះទេ ត្រូវស្វែងរកចំណុចខ្លាំងរបស់យើង ទៅប្រជែងនឹងគេ ជាក់ស្តែងដូចបញ្ហាកសិកម្មនៅកម្ពុជា ដែលត្រូវការទាំងអ្នកជំនាញ និងពេលវេលា​”។

លោក ហឿន សំនៀង ណែនាំឱ្យយុវវ័យជំនាន់ក្រោយ បន្តចូលរួមសកម្មភាពក្នុងសង្គមឱ្យបានច្រើន ដើម្បីអាចបណ្តុះគំនិត រួមចំណែកអភិវឌ្ឍនសង្គមជាតិ នាពេលអនាគត៕