ធ្លាប់​ដឹង​ទេ ភ្នំពេញ​មាន​ដើមឈើធំៗ អាយុកាលជាង៣០០ឆ្នាំរាប់​សិប​ដើម តាម​សួនកាណាឌីយ៉ា

ភ្នំពេញ៖ អ្នកដំណើរ​ភាគច្រើន​ពិត​ជា​ទាក់ភ្នែក​ ដើមឈើធំៗជាច្រើនដើមនៅលើសួនកាណាឌីយ៉ានៅមុខមន្ទីរពេទ្យអង្គឌួង ស្ថិតក្នុងខណ្ឌដូនពេញ ដោយ​មិន​ដឹង​ពី​អាយុកាល​របស់​វា។

លោកសំ សាមុត ប្រធានអង្គភាពសួនច្បារនិងរុក្ខជាតិ នៃមន្ទីរសាធារណការនិងដឹកជញ្ជូនរាជធានីភ្នំពេញ​​បានឱ្យដឹងនៅព្រឹកថ្ងៃ០៨ មករានេះថា ដើមឈើ​ធំៗនៅសួនកាណាឌីយ៉ាមុខពេទ្យព្រះអង្គឌួងនេះ មានចំនួនប្រមាណ ៥០ ដើម និងមានអាយុកាលប្រមាណជាជាង៣០០ឆ្នាំមកហើយ។

លោកសំ សាមុត ក៏បានបន្ថែមទៀតថា សម្រាប់ដើមឈើ​នៅរមណីយដ្ឋានវត្តភ្នំវិញ គឺមានចំនួនដើមឈើសរុបប្រមាណជា៨០០ដើម ហើយដើមឈើទាំងនេះភាគច្រើនគឺមានអាយុកាលប្រមាណជាង៥០០ឆ្នាំហើយ ក្រោមការមើលថែទាំជាប្រចាំពីអាជ្ញាធររាជធានីភ្នំពេញ។

គួរបញ្ជាក់ថា រាជធានីភ្នំពេញ ត្រូវបានកកើតជាលើកដំបូងនៅក្នុងសតវត្សរ៍ទី១៥ ក្នុង​ អំឡុងរជ្ជកាលព្រះបាទស្រីសុរិយោព័រ(ពញាយ៉ាត) នៅពេលដែល​ព្រះអង្គបានបោះបង់ចោលរាជធានីអង្គរ ហើយបានមកសាងសង់រាជធានីថ្មី មួយទៀតនៅទួលបាសាន ក្នុងខេត្តស្រីសឈរ ដែលសព្វថ្ងៃត្រូវបានគេ​ស្គាល់ថា ជាស្រុកស្រីសន្ធរ ខេត្តកំពង់ចាម។ ព្រះអង្គ បានគង់នៅទីនោះបាន​តែមួយឆ្នាំគត់ដោយសារតែមានទឹកជំនន់រាល់រដួវវស្សា ព្រះអង្គបានផ្លាស់ប្តូររាជធានី ហើយបានមកសាងសង់រាជធានីថ្មីមួយទៀតតាមបណ្តោយមាត់ទន្លេចតុមុខ (ទន្លេមុខបួន) នៅក្នុងឆ្នាំ ១៤៣៤ ដែលសព្វថ្ងៃជារាជធានីភ្នំពេញនេះឯង៕

អត្ថបទ៖ ស្រីរ័ត្ន