ព័ត៌មានជាតិ

លោកអ៊ិត សំហេង៖ ការផ្សព្វផ្សាយព័ត៌មានពិត ជាផ្នែកជួយចូលរួមអភិវឌ្ឍប្រទេសជាតិ

បានផុស

២ years មុន

នៅ

ថ្ងៃចន្ទ ២៦ ធ្នូ ២០២២

ដោយ

លោកបណ្ឌិត អ៊ិត សំហេង រដ្ឋមន្ត្រីក្រសួងការងារ នឹងបណ្ដុះបណ្ដាលវិជ្ជាជីវៈបានថ្លែងថា នៅលើបណ្ដាញផ្សព្វផ្សាយសង្គមសព្វថ្ងៃនេះ មានព័ត៌មានក្លែងក្លាយមួយចំនួនកំពុងបំភាន់មតិសាធារណជនឱ្យបន្ទច់បង្អាក់ដំណើរការអភិវឌ្ឍប្រទេសដែលបានខិតខំយ៉ាងលំបាករបស់រាជរដ្ឋាភិបាល ដូច្នេះអ្នកដែលលេងបណ្ដាញសង្គមគួរផ្សព្វផ្សាយនូវព័ត៌មានពិត ទាក់ទងនឹងសមិទ្ធផលនានារបស់រាជរដ្ឋាភិបាល ដើម្បីឱ្យសាធារណមតិទាំងក្នុងនិងក្រៅប្រទេសបានយល់ដឹងនិងចូលរួមចំណែកក្នុងការការពារសមិទ្ធផលទាំងនេះឱ្យស្ថិតស្ថេរគង់វង្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងពិធីបើកវគ្គបណ្ដុះបណ្ដាលស្ដីពីការប្រើប្រាស់បណ្ដាញសង្គមហ្វេសប៊ុកកាលពីថ្ងៃ ២៥ ខែធ្នូ ម្សិលមិញ លោកបណ្ឌិតអ៊ិត សំហេង បានមានប្រសាសន៍ថា រាជរដ្ឋាភិបាលកម្ពុជាកំពុងជំរុញទៅលើការប្រើប្រាស់ប្រព័ន្ធបច្ចេកវិទ្យា ដើម្បីជំរុញល្បឿនការងារឱ្យបានលឿន ទាន់ពេលវេលា កាត់បន្ថយការចំណាយ និងផ្សព្វផ្សាយប្រព័ន្ធព័ត៌មានពិតពីកម្ពុជាឱ្យបានដល់ដៃសាធារណជនក្នុង និងក្រៅប្រទេស។

ដោយឈរលើមូលដ្ឋាននេះ រាជរដ្ឋាភិបាលកម្ពុជាបានយកចិត្តទុកដាក់យ៉ាងខ្លាំងលើការអភិវឌ្ឍប្រព័ន្ធបច្ចេកវិទ្យា ការអភិវឌ្ឍជំនាញវិជ្ជាជីវៈ ការប្រើប្រាស់បច្ចេកវិទ្យា ក្នុងការបណ្ដុះបណ្ដាលបច្ចេកទេសវិជ្ជាជីវៈ សំដៅធ្វើឱ្យប្រជាជន ជាពិសេសយុវជនទាំងអស់អាចទទួលបានការសិក្សា ការអប់រំប្រកបដោយ គុណភាព សមត្ថភាព ដើម្បីក្លាយជាធនធានមនុស្សដ៏មានសក្ដានុពលក្នុងការចូលរួមចំណែកអភិវឌ្ឍន៍សេដ្ឋកិច្ច សង្គមជាតិឱ្យកាន់តែមានការរីកចម្រើន។

លោកអ៊ិត សំហេង បានគូសបញ្ជាក់ដែរថា ប្រមុខរាជរដ្ឋាភិបាលកម្ពុជាបានចាត់ទុកបណ្តាញសង្គមហ្វេសប៊ុក ជាយន្តការដ៏សំខាន់មួយដើម្បីធ្វើការ និងទទួលដោះស្រាយនូវសំណូមពរ ឬបញ្ហានានា ដោយតម្រូវឱ្យគ្រប់ក្រសួងស្ថាប័ន ត្រូវតែមានផេករបស់ខ្លួន ដើម្បីទទួលព័ត៌មាននិងស្រាយរាល់កង្វល់របស់ប្រជាពលរដ្ឋ។

លោករដ្ឋមន្រ្តីក៏សង្ឃឹមថា បន្ទាប់ពីបណ្ដុះបណ្ដាលនេះ សិក្ខាកាមទាំងអស់នឹងមានសមត្ថភាពខ្ពស់ក្នុងការប្រើប្រាស់បណ្ដាញសង្គម ដើម្បីផ្សព្វផ្សាយព័ត៌មាន សមិទ្ធផលនានា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ។ មិនតែប៉ុណ្ណោះ សិក្ខាកាមក៏អាចចេះប្រើប្រាស់ហេ្វសប៊ុកជាមធ្យោបាយដើម្បីវាយបក ឬបកស្រាយបំភ្លឺសាធារណមតិ រាល់ព័ត៌មានញុះញង់ បំផុសបំផុល ប្រជាភិថុតិ ឬបំភ្លៃការពិតនៅតាមបណ្ដាញហេ្វសប៊ុក និងបណ្តាញសង្គមផ្សេងទៀតឱ្យបានទាន់ពេលវេលាផងដែរ។

គួរបញ្ជាក់ថា វគ្គបណ្ដុះបណ្ដាលនេះ មានគោលបំណងឱ្យសិក្ខាកាមបានយល់ដឹងពី បច្ចេកទេសនៃការប្រើប្រាស់ប្រព័ន្ធបណ្ដាញសង្គមឱ្យកាន់តែមានប្រសិទ្ធភាព ដូចជាការថត ការកាត់តរូបភាពតាមទូរស័ព្ទ របៀបបង្កើត TikTok, ការជ្រើសរើសរូបភាព និងព័ត៌មានក្នុងការផ្សព្វផ្សាយ, ការចុះបដិសេធ គាំទ្រលើព្រឹត្តិការណ៍ ឬព័ត៌មាននានា, ការផ្សព្វផ្សាយសមិទ្ធផលនានារបស់រាជរដ្ឋាភិបាល សកម្មភាពរបស់ថ្នាក់ដឹកនាំ ផលប្រយោជន៍នានា ដល់កម្មករនិយោជិក និងសាធារណជន, ការបែងចែកព័ត៌មានដែលផ្ទុយពីការពិត ទៅនឹងព័ត៌មានពិត ដែលគួរជឿ និងមិនគួរជឿ, ការរៀបចំខ្លឹមសារសរសេរ និងយុទ្ធសាស្ត្រដែលមានភាពទាក់ទាញ ប្រកបដោយប្រសិទ្ធភាព៕

ដោយ៖ ថារី

Related Topics:លោក អ៊ិត សំហេង