អភិបាលខេត្តកំពង់ស្ពឺ ប្រគល់ម៉ូតូដល់សិស្សប្រឡងបាក់ឌុបជាប់និទ្ទេស A ចំនួន ២២នាក់ តាមការសន្យាហើយ  

ដូចការសន្យា! លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានប្រគល់ម៉ូតូដល់សិស្សប្រឡងបាក់ឌុបជាប់និទ្ទេស A ចំនួន ២២នាក់ នៅក្នុងខេត្តកំពង់ស្ពឺ។

កាលពីថ្ងៃទី ៥ ខែធ្នូ ឆ្នាំ ២០២២ ដែលជាសម័យប្រឡងបាក់ឌុបឆ្នាំ ២០២២ លោក វ៉ី សំណាង អភិ​បាលខេត្តកំពង់ស្ពឺ បានសន្យាថា នឹងផ្ដល់រង្វាន់សម្រាប់សិស្សប្រឡងជាប់និទ្ទេស A ដូចរៀងរាល់ឆ្នាំដដែល។ ជាលទ្ធផល នៅខេត្តកំពង់ស្ពឺ មានសិស្សប្រឡងបាក់ឌុបជាប់និទ្ទេស A ចំនួន ២២នាក់។

នៅព្រឹកថ្ងៃទី ២៨​ ខែធ្នូ ឆ្នាំ ២០២២នេះ លោក វ៉ី សំណាង អភិបាលខេត្តកំពង់ស្ពឺ បានប្រគល់ម៉ូតូដែលជារង្វាន់លើកទឹកចិត្តជូនសិស្សប្រឡងជាប់និទ្ទេស A ចំនួន ២២នាក់ ដោយក្នុងម្នាក់ៗ ម៉ូតូមួយគ្រឿង តាមការសន្យារួចហើយ។

ជាមួយគ្នានេះ លោកអភិបាលខេត្ត បានសរសេរនៅលើគណនីហ្វេសប៊ុកថា សម្រាប់សិស្សានុ-សិស្ស ដែលប្រឡងមិនជាប់ ប្រសិនបើអាចសូមទៅរៀននៅសាលា “មជ្ឈមណ្ឌលបណ្ដុះបណ្ដាលវិជ្ជាជីវៈរលាំងឈូក”។

បើតាមលោក វ៉ី សំណាង មជ្ឈមណ្ឌលវិជ្ជាជីវៈរលាំងឈូកនេះ រៀនមិនគិតថ្លៃនោះទេ ព្រមទាំងមានអាហារ ៣ពេល សម្រាប់សិស្សានុ-សិស្ស ផងដែរ។ លោកថា ចំណាយរយៈពេល ២ឆ្នាំ សិស្សានុ-សិស្ស នឹងទទួលបានសញ្ញាបត្រ បរិញ្ញាបត្ររង៕