ព័ត៌មានជាតិ

ចម្ងាយផ្លូវនៅសល់ជាង ១ គីឡូម៉ែត្រពីកោះធំទៅក្អមសំណរ គ្រោងបញ្ចប់នៅឆ្នាំ២០២៣

បានផុស

៤ years មុន

នៅ

ថ្ងៃព្រហស្បតិ៍ ២៩ ធ្នូ ២០២២

ដោយ

អាជ្ញាធរខេត្តកណ្តាល បានដាក់ផែនការនឹងបញ្ចប់ការស្ថាបនាផ្លូវមួយខ្សែភ្ជាប់ពីស្រុកកោះធំទៅច្រកក្អមសំណរ ខណៈនៅសល់ប្រវែងជាង ១ គីឡូម៉ែត្រទៀតមិនទាន់រួចរាល់។

លោក នូវប៉េង ច័ន្ទតារា អ្នកនាំពាក្យសាលាខេត្តកណ្តាលបានឲ្យកម្ពុជាថ្មីដឹងនៅព្រឹកនេះថា កំណាត់ផ្លូវនេះបានបើកការដ្ឋានសាងសង់តាំងពីឆ្នាំ ២០១៨ មានប្រវែងជាង ១០ គីឡូម៉ែត្រ មកដល់ពេលនេះនៅសល់ជាង ១ គីឡូម៉ែត្រទៀតមិនទាន់សាងសង់បញ្ចប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា ក្នុងប្រវែងផ្លូវជាង ១០ គីឡូម៉ែត្រ ដែលនៅសល់ជាង ១ គីឡូម៉ែត្រ លោកអភិបាលខេត្តបានដាក់ផែនការធ្វើយ៉ាងណាឲ្យរួចរាល់នៅឆ្នាំ២០២៣នេះ។ ផ្លូវដែលសល់ជាង ១ គីឡូម៉ែត្រនេះ ការសាងសង់បញ្ចប់ក៏មានប៉ះពាល់ដល់ផលដំណាំប្រជាពលរដ្ឋ ហើយអាជ្ញាធរកំពុងជំរុញដោះស្រាយឲ្យចប់សព្វគ្រប់។

មន្រ្តីខេត្តរូបនេះបានបញ្ជាក់ថា ដោយសារជាតំបន់លិចទឹកកំណាត់ផ្លូវថ្មីនេះត្រូវលើកឲ្យខ្ពស់ផុតពីទឹកហើយជាជំហានដំបូងត្រូវស្ថាបនាជាផ្លូវដីសិន ហើយអនាគតអាចនឹងលើកកម្រិតជាផ្លូវបេតុងតែម្តង។

កាលពីឆ្នាំ២០១៨ ជំនាន់លោក ម៉ៅ ភិរុណជាអភិបាលខេត្តកណ្តាល បានបើកការដ្ឋានស្ថាបនាមានប្រវែងជាង ១០ គីឡូម៉ែត្រ បំបែកចេញពីផ្លូវខេត្តលេខ ១១០ ចំណុចគីឡូម៉ែត្រលេខ៩០ ស្ថិតក្នុងភូមិព្រែកទន្លា ឃុំព្រែកជ្រៃ ស្រុកកោះធំ ទៅទល់ជាមួយផ្លូវលេខ១១៨ A ចំណុចគីឡូម៉ែត្រលេខ ៤៥ ស្ថិតក្នុងឃុំក្អមសំណរ ស្រុកលើកដែក។