អភិបាលរាជធានី អរគុណអាជ្ញាធរ ១៤ខណ្ឌ និងគណៈកម្មការផ្សារ ក្នុងការទប់ស្កាត់ជំងឺកូវីដ-១៩

លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានសម្តែងនូវការអរគុណយ៉ាងជ្រាលជ្រៅចំពោះអាជ្ញាធរខណ្ឌទាំង១៤ និងប្រធានផ្សារទាំងអស់ដែលបានយកចិត្តទុកដាក់ និងយកអស់កម្លាំងកាយចិត្តក្នុងការទប់ស្កាត់ជំងឺកូវីដ-១៩ រហូតបើកសេដ្ឋកិច្ចប្រទេសឱ្យដំណើរការជាប្រក្រតីឡើងវិញ រហូតមកដល់ពេលនេះ។

ការកោតសរសើរនេះធ្វើឡើង ខណៈលោកអភិបាលរាជធានីដឹកនាំកិច្ចប្រជុំត្រួតពិនិត្យសកម្មភាពការងារ នៃការគ្រប់គ្រងផ្សាររដ្ឋក្នុងរាជធានីភ្នំពេញ នារសៀលថ្ងៃទី២៩ ខែធ្នូ  ឆ្នាំ២០២២ នៅសាលារាជធានីភ្នំពេញ ដោយមានការចូលរួមពីអភិបាលខណ្ឌទាំង១៤ និងប្រធានផ្សាររដ្ឋក្នុងរាជធានីភ្នំពេញទាំងអស់។

លោក ឃួង ស្រេង បានមានប្រសាសន៍ថា ក្នុងតំណាក់កាល នៃការរីករាលដាលជំងឺកូវីដ-១៩ អាជ្ញាធរខណ្ឌទាំង១៤ និងប្រធានគណៈកម្មការផ្សាររដ្ឋក្នុងរាជធានីភ្នំពេញទាំង បានលះបង់ទាំងកម្លាំងកាយ និងកម្លាំងចិត្ត ដោយមិនខ្វល់ពេលយប់ ឬថ្ងៃ សំខាន់ធ្វើយ៉ាងណាឱ្យប្រជាពលរដ្ឋ អាជីវករបានឆ្លងផុតពីជំងឺដ៏កាចសាហាវនេះ។ អ្វីដែលជាការខិតខំប្រឹងប្រែង មិនខ្លាចនឿយហត់ពីសំណាក់អាជ្ញាធរ និងគណៈកម្មការផ្សារនេះ ទើបធ្វើឱ្យយើងអាចបើកសេដ្ឋកិច្ចប្រទេសដំណើរការជាប្រក្រតីឡើងវិញ។

គួរបញ្ជាក់ថា គិតមកដល់ពេលនេះ រាជធានីភ្នំពេញមាន ២៥ផ្សារ ហើយក្នុងតំណាក់កាលនៃការរីករាលដាលជំងឺកូវីដ-១៩ គណៈកម្មការផ្សារ បានដើរតួយ៉ាងសំខាន់ក្នុងការទប់ស្កាត់ជំងឺដ៏កាចសាហាវនេះ៕

អត្ថបទ៖ ស្រីរ័ត្ន