ព័ត៌មានជាតិ

គ.ជ.ប សោកស្តាយចំពោះ LDP ដែលមិនទទួលស្គាល់លទ្ធផលបញ្ជីឈ្មោះបោះឆ្នោត

បានផុស

៤ years មុន

នៅ

ថ្ងៃសុក្រ ៨ មករា ២០២១

ដោយ

គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីថ្លែងការណ៍មួយ សម្តែងការសោកស្តាយនិងខកចិត្តចំពោះ គណបក្សសម្ព័ន្ធដើម្បីប្រជាធិបតេយ្យ(LDP) ដែលបានបដិសេធមិនទទួលស្គាល់លទ្ធផលនៃការចុះឈ្មោះបោះឆ្នោត ថែមទាំងមានការតិះដៀលស្អប់ខ្ពើបស្ថាប័នជាតិសាសន៍ខ្លួនឯង រួមមាន គ.ជ.ប ដែលជាអាជ្ញាកណ្តាល នឹងបានបដិសេធក្រុមប្រឹក្សាធម្មនុញ្ញផងដែរ។

ប្រតិកម្មរបស់ គ.ជ.ប កើតមានឡើង បន្ទាប់ពីគណបក្សសម្ព័ន្ធដើម្បីប្រជាធិបតេយ្យ បានអះអាងថាខ្លួនរកឃើញពីភាពមិនត្រឹមត្រូវអំពីដំណើរការត្រួតពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២០ ហើយថា នឹងដាក់ឯកសារតវ៉ាទៅកាន់ស្ថានទូតបរទេសនៅកម្ពុជា ដើម្បីបកអាក្រាតពីភាពមិនត្រឹមត្រូវ។

ប៉ុន្តែយ៉ាងណា គ.ជ.ប សង្កេតឃើញថា ចាប់តាំងពីការចាប់ផ្តើមដាក់ភ្នាក់ងារគណបក្សនយោបាយ គណបក្សសម្ព័ន្ធដើម្បីប្រជាធិបតេយ្យ បានព្យាយាមបង្កើតជាបញ្ហាផ្សេងៗ មិនឈប់ឈរ ដូចជា បង្កើតទម្រង់ប្រើប្រាស់សម្រាប់ភ្នាក់ងារគណបក្សនយោបាយ ដើម្បីសង្កេតមើលការចុះឈ្មោះបោះឆ្នោត ដែលទម្រង់នេះខុសពីនីតិវិធីរបស់ គ.ជ.ប គឺទម្រង់បែបបទពាក្យសុំចុះឈ្មោះ ភ្នាកងារគណបក្សនយោបាយ (ទ.១០០៧) ដែលទម្រង់នេះគេអាចទាញយកបានយ៉ាងស្រួលពីគេហទំព័ររបស់ គ.ជ.ប។

គណៈកម្មាធិការជាតិរៀបចំការបោះឆ្នោត អះអាងថា ការវាយប្រហាររបស់គណបក្សសម្ព័ន្ធដើម្បីប្រជាធិបតេយ្យមកលើរចនាសម្ព័ន្ធ និងស្ថាប័នជាតិ គឺជាការបោកប្រាស់ប្រជាពលរដ្ឋខ្មែរទូទាំងប្រទេស ឲ្យឃើញថា មានតែគណបក្សខ្លួនទេ ដែលស្រលាញ់ជាតិ និងប្រជាជនជាងគេ ក្រៅពីនោះសុទ្ធតែក្បត់ឆន្ទៈរាស្ត្រ៕