ខេត្តកំពង់ចាម ទទួលបានភ្ញៀវទេសចរជិត៨ម៉ឺននាក់ក្នុងឱកាសចូលឆ្នាំសកល

នៅក្នុងឱកាសចូលឆ្នាំថ្មី ឆ្នាំសកល ឆ្នាំ២០២៣ កាលពីថ្ងៃទី៣១ ខែធ្នូ ឆ្នាំ២០២២ ខេត្តកំពង់ចាម ទទួលបានទេសចរ មកទស្សនា នៅតាមកន្លែងកម្សាន្ត និងរមណីយដ្ឋាននានា សរុបមានចំនួន ៧៦.៩០១នាក់ ក្នុងនោះភ្ញៀវជាតិ មានចំនួន ៧៦.៧៧៩នាក់ និងភ្ញៀវបរទេស មានចំនួន ១២២នាក់ ។ នេះបើតាមរបាយការណ៍របស់លោក ស៊ាន សុគុណ ប្រធានមន្ទីរទេសចរណ៍ ខេត្តកំពង់ចាម បានប្រាប់អ្នកព័ត៌មានយើង នាព្រឹកថ្ងៃទី០២ ខែមករា ឆ្នាំ២០២៣ នេះ ។

លោក ស៊ាន សុគុណ បញ្ជាក់ទៀតថា ក្នុងចំណោមភ្ញៀវសរុបខាងលើនេះ គឺបានមកលេងនៅតាមកន្លែងកម្សាន្ត និងរមណីយដ្ឋាន រមណីយដ្ឋានទឹកឆា ភ្ញៀវទេសចរសរុបមានចំនួន ៣.៦០២នាក់ ក្នុងនោះភ្ញៀវជាតិមានចំនួន ៣.៥៨៥នាក់ និងភ្ញៀវបរទេស ចំនួន ១៧នាក់ ។ រមណីយដ្ឋានកសិទេសចរណ៍-ថ្មដាទឹកឆា ភ្ញៀវទេសចរសរុបមានចំនួន ២២៦នាក់ ។ រមណីយដ្ឋានប្រាសាទភ្នំហាន់ជ័យ ភ្ញៀវទេសចរសរុបមានចំនួន ២០២នាក់ ។ រមណីយដ្ឋានបែមប៊ូរីសត ភ្ញៀវទេសចរសរុបមានចំនួន ៣០នាក់ ក្នុងនោះភ្ញៀវជាតិ មានចំនួន ២៥នាក់ និងភ្ញៀវបរទេសចំនួន ០៥នាក់ ។ រមណីយដ្ឋានភ្នំប្រុស-ភ្នំស្រី ភ្ញៀវទេសចរសរុបមានចំនួន ៣៣៣នាក់ ក្នុងនោះភ្ញៀវជាតិមានចំនួន ៣១៥នាក់ និងភ្ញៀវបរទេសមានចំនួន ១៨នាក់ ។ រមណីយដ្ឋាននគរបាជ័យ ភ្ញៀវទេសចរសរុបមានចំនួន ២៤៥នាក់ ។ រមណីយដ្ឋានប្រាសាទភ្នំជើងព្រៃ ភ្ញៀវទេសចរសរុបមានចំនួន ១៤២នាក់ ។ រមណីយដ្ឋានឆ្នេរខ្សាច់កោះប៉ែន ភ្ញៀវទេសចរសរុបមានចំនួន ៨.៥១៨នាក់ ក្នុងនោះភ្ញៀវជាតិ មានចំនួន ៨.៤៨១នាក់ និងភ្ញៀវបរទេសមានចំនួន ៣៦នាក់ ។ អាហារដ្ឋានស្មៅទន្លេ ភ្ញៀវទេសចរសរុបមានចំនួន ១៥០នាក់ ។ ក្រុងកំពង់ចាម ភ្ញៀវទេសចរណ៍ មានចំនួន ៦៣.២៩១នាក់ ក្នុងនោះភ្ញៀវជាតិ មានចំនួន ៦៣.២៥០នាក់ និងភ្ញៀវបរទេសចំនួន ៤១នាក់ ។ ក្រោពីនោះ ភ្ញៀវមកស្នាក់នៅតាមផ្ទះសំណាក់ និងសណ្ឋាគារ សរុបចំនួន ១៦២នាក់ ក្នុងនោះភ្ញៀវជាតិ មានចំនួន ១៥៧នាក់ និងភ្ញៀវបរទេស ចំនួន ០៥នាក់ ផងដែរ ៕

អត្ថបទ៖ ឡេក ចាន់ពេជ្រ