សម្ដេចតេជោ ហ៊ុន សែន ឱ្យបង្កើតតំបន់អចិន្ត្រៃយ៍បោះយុថ្កាទម្លាក់ពោង​ការពារជីវិតផ្សោត

សម្ដេចតេជោ ហ៊ុន សែន នាយករដ្ឋមន្ត្រីកម្ពុជានៅថ្ងៃទី ០២ ខែមករា ឆ្នាំ ២០២៣ បានដាស់តឿនឱ្យអាជ្ញាធរខេត្តក្រចេះ និងខេត្តស្ទឹងត្រែងសហការជាមួយក្រសួងកសិកម្ម រុក្ខាប្រមាញ់ និងនេសាទបង្កើតឲ្យមានតំបន់ស្នូលអចិន្ត្រៃយ៍ធ្វើការបោះយុថ្កាទម្លាក់ពោង​នៅតាមតំបន់ទន្លេហាមមិនឱ្យប្រជាជនចូលនេសាទ​ដើម្បីការពារជីវិតសត្វផ្សោត និងត្រីដែលជិតផុតពូជ។

សម្ដេចតេជោ ហ៊ុន សែន សង្ឃឹមថា ប្រជាពលរដ្ឋ​នឹងមានការចូលរួមទៅលើការអភិរក្ស​ដោយមិនត្រូវធ្វើការនេសាទនៅក្នុងតំបន់​ដែលមានការហាមឃាត់នោះទេ​។

អង្គការមូលនិធិធម្មជាតិសកលហៅកាត់ WWF កាលពីពេលថ្មីៗនេះ បានប្រកាសអាសន្នអំពីការស្លាប់ជាបន្តបន្ទាប់សត្វផ្សោតទន្លេមេគង្គនៅកម្ពុជា ខណៈនៅឆ្នាំ២០២២នេះ មានសត្វផ្សោតស្លាប់បានកើនឡើងរហូតដល់ទៅ ១១ ក្បាល។

លោក សេង ទៀក នាយកអង្គការ WWF-កម្ពុជា បានមានប្រសាសន៍ថា «ការកើនឡើងនៃសកម្មភាពនេសាទខុសច្បាប់​នៅក្នុងតំបន់អភិរក្សសត្វផ្សោតនាពេលថ្មីៗនេះ នឹងបណ្តាលឱ្យសត្វផ្សោតទន្លេមេគង្គឈានទៅផុតពូជ ប្រសិនបើគ្មានវិធានការបន្ទាន់ដើម្បីបញ្ឈប់សកម្មភាពខុសច្បាប់ទាំងនេះទេ។

សត្វផ្សោតងាប់ដោយសារមូលហេតុមួយចំនួនដូចជា ជាប់មងរបស់អ្នកនេសាទ អាយុចាស់ និងការឆក់ជាដើម៕