អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ ចូលរួមសំខាន់លើកកម្ពស់សុខភាពពលរដ្ឋ

លោក ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការ គណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា (គ.ជ.នា/ក.អ.ក-CRDB/CDC) បានអះអាងថា អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ បានចូលរួមចំណែកយ៉ាងសំខាន់ក្នុងការលើកកម្ពស់សុខភាពដល់ប្រជាពលរដ្ឋកម្ពុជាឱ្យកាន់តែប្រសើរឡើងថែមទៀត។

ថ្លែងក្នុងឱកាសដឹកនាំគណៈប្រតិភូចុះពិនិត្យមើលអគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ ក្នុងមន្ទីរពេទ្យព្រះអង្គឌួង ដែលជាជំនួយរបស់ កយកា-KOICA នៅព្រឹកថ្ងៃទី៤ ខែមករានេះ លោក ឈៀង យ៉ាណារ៉ា មានប្រសាសន៍បន្តថា អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ នេះគឺជាអគារមន្ទីរពេទ្យដ៏ល្អបំផុត នៃមន្ទីរពេទ្យជាតិក្នុងប្រទេសកម្ពុជា ដែលមានទីតាំងនៅចំកណ្តាលទីក្រុង នឹងចំកណ្តាលបេះដូងនៃរាជធានីភ្នំពេញ។

លោក ឈៀង យ៉ាណារ៉ា លើកឡើងថា គោលបំណង នៃការធ្វើទស្សនកិច្ចនេះគឺ ដើម្បីពិនិត្យមើលពីសមិទ្ធផលនានា ដូចជាដំណើរការនៃប្រតិបត្តិការរបស់ អគារជំងឺត្រចៀក ច្រមុះ បំពង់ក មិត្តភាពកម្ពុជា-កូរ៉េ និងពិនិត្យមើលអគារថ្មី សម្ភារៈបរិក្ខារពេទ្យ និងសម្ភារៈការិយាល័យ ដោយសារ គ.ជ.នា/ក.អ.ក-CRDB/CDC ជា “សេវាច្រកចេញចូលតែមួយ” និង “ការិយាល័យកណ្តាល” របស់រាជរដ្ឋាភិបាល ដែលសម្របសម្រួលជាមួយដៃគូអភិវឌ្ឍន៍ និងអង្គការក្រៅរដ្ឋាភិបាលដែលផ្តល់ជំនួយអភិវឌ្ឍន៍។ លើសពីនេះទៀត គ.ជ.នា-CRDB ក៏មានតួនាទីជាចំណុចបង្គោលក្នុងទំនាក់ទំនងជាមួយស្ថាប័នរដ្ឋាភិបាល ដើម្បីគ្រប់គ្រងកិច្ចសហប្រតិបត្តិការអភិវឌ្ឍន៍ និងភាពជាដៃគូនៅក្នុងប្រទេសកម្ពុជា។

លោករដ្ឋមន្ត្រីប្រតិភូអមនាយករដ្ឋមន្ត្រី បានវាយតម្លៃខ្ពស់ចំពោះសមិទ្ធផលដែល កយកា-KOICA សម្រេចបាន និងបានថ្លែងអំណរគុណចំពោះ កយកា-KOICA និងប្រជាជន និងរដ្ឋាភិបាល នៃសាធារណរដ្ឋកូរ៉េ ដែលបានគាំទ្រយ៉ាងខ្ជាប់ខ្ជួនដល់ការអភិវឌ្ឍន៍សេដ្ឋកិច្ច-សង្គមរបស់កម្ពុជា តាមរយៈការអនុវត្តគម្រោង និងកម្មវិធីនានាជាច្រើននៅក្នុងប្រទេសកម្ពុជា។

លោកសាស្ត្រាចារ្យ លូ លីឃាង នាយក មន្ទីរពេទ្យព្រះអង្គឌួង និងជាទីប្រឹក្សាក្រសួងសុខាភិបាល បានមានប្រសាសន៍ថា អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ ដែលបានដាក់ឱ្យប្រើប្រាស់កាលពីដើមឆ្នាំ២០២២កន្លងទៅ ត្រូវបានសាងសង់ដោយ កយកា-KOICA ក្រោមជំនួយឥតសំណងរបស់រដ្ឋាភិបាលកូរ៉េ ដែលមានតម្លៃសរុបក្នុងគម្រាងទាំងមូល ៨ លានដុល្លារអាមេរិក។ អគារថ្មីនេះមានកម្ពស់ ៥ជាន់ បំពាក់ដោយឧបករណ៍ទំនើបសម្រាប់ការធ្វើរោគវិនិច្ឆ័យ ការព្យាបាល និងការវះកាត់ ត្រូវបានសាងសង់នៅក្នុងបរិវេណ មន្ទីរពេទ្យព្រះអង្គឌួង ដើម្បីជួយកែលម្អសេវាវេជ្ជសាស្រ្តនៅក្នុងមន្ទីរពេទ្យនេះកាន់តែប្រសើរថែមទៀត ខណៈចប្ចុប្បន្ននេះគិតជាមធ្យមក្នុង ១ថ្ងៃមន្ទីរពេទ្យបានទទួលអ្នកជំងឺមកពិគ្រោះជំងឺក្រៅប្រមាណពី ១ ៣០០ ទៅ ១ ៥០០ នាក់ ដែលភាគច្រើនជាប្រជាពលរដ្ឋទូទៅ និងកម្មកររោងចក្រ និងវះកាត់ជាមធ្យមក្នុង ១ថ្ងៃ ចំនួន ១៣០ នាក់ ក្នុងនោះវះកាត់ភ្នែក ត្រចៀក ច្រមុះ និងបំពង់ក ប្រមាណ ១០០ នាក់។

លោក នោ ហ្យន់ជូន (RHO Hyunjun) ប្រធាន តំណាងទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំនៅកម្ពុជា ​មានប្រសាសន៍​ថា ការជួយសាងសង់អគារជំងឺត្រចៀក ច្រមុះ បំពង់ក មិត្តភាពកម្ពុជា-កូរ៉េ ដល់មន្ទីរពេទ្យព្រះអង្គឌួង គឺដើម្បីជួយធ្វើឱ្យមន្ទីរពេទ្យនេះមានភាពប្រសើរឡើង​នូវ​ហេដ្ឋា​រចនាសម្ព័ន្ធរូបវន្ត ​សមត្ថភាពរបស់វេជ្ជបណ្ឌិតឯកទេស ​និង​បុគ្គលិក​ក៏មានភាពជឿនលឿន តាម​រយៈការផ្តល់កម្មវិធី​បណ្តុះបណ្តាលទៅលើការ​អនុវត្តសេវាជាក់ស្តែង និងការផ្ទេរចំណេះដឹង​កម្រិត​ខ្ពស់ និងការចែករំលែកបទពិសោធន៍​ជាមួយវេជ្ជបណ្ឌិតកូរ៉េ។

លោកបានបន្តថា បច្ចុប្បន្ននេះ កយកា-KOICA បានជួយសាងសង់អគារចំនួនពីរក្នុងបរិវេណមន្ទីរពេទ្យព្រះអង្គឌួងគឺ អគារ ចក្ខុរោគ មិត្តភាពកម្ពុជា-កូរ៉េ និងអគារជំងឺត្រចៀក ច្រមុះ បំពង់ក មិត្តភាពកម្ពុជា-កូរ៉េ៕

អត្ថបទ៖ សំអឿន