ក្រសួងវប្បធម៌ ស្នើអគ្គស្នងការនគរបាលជាតិ ទប់ស្កាត់ការផ្សព្វផ្សាយចម្រៀង «ឈាមបាតុករ» មានចេតនាញុះញង់

លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានស្នើឲ្យលោកនាយឧត្ដមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ជួយអន្តរាគមន៍ចាត់វិធានការទប់ស្កាត់បណ្តាញប្រព័ន្ធព័ត៌មានសង្គម ដែលបានយកបទចម្រៀងអមដោយរូបភាពក្រោមចំណងជើង «ឈាមបាតុករ» ទៅបង្ហោះផ្សព្វផ្សាយដែលមានខ្លឹមសារ អុជអាល ញុះញង់។

តាមរយៈលិខិតជម្រាបជូន អគ្គស្នងការនគរបាលជាតិ នៅថ្ងៃទី៦ ខែមករា ឆ្នាំ២០២៣នេះ លោកស្រីបណ្ឌិតសភាចារ្យ ភឿង សកុណា បានរៀបរាប់ថា ក្រសួងវប្បធម៌និងវិចិត្រសិល្បៈ បានពិនិត្យឃើញក្នុងពេលបច្ចុប្បន្ននេះ មាន Page បណ្តាញប្រព័ន្ធព័ត៌មានសង្គមមួយចំនួន បានយកបទចម្រៀងអមដោយរូបភាពក្រោមចំណងជើងថា «ឈាមបាតុករ» ដែលមានខ្លឹមសារ អុជអាល ញុះញង់ អាចនឹងបង្កអសន្តិសុខ សណ្តាប់ធ្នាប់ដល់សង្គម របស់អ្នកនិពន្ធទំនុកច្រៀង និងអ្នកច្រៀងឈ្មោះ គា សុគន្ធ ដែលធ្លាប់ត្រូវបានក្រសួងមហាផ្ទៃចាត់វិធានការបិទ និងផ្ដន្ទាទោសម្ដងរួចហើយ មកផ្សព្វផ្សាយជាថ្មីឡើងវិញ។

លោកស្រីរដ្ឋមន្ត្រីបន្ថែមថា ដើម្បីទប់ស្កាត់នូវភាពមិនប្រក្រតី ដែលអាចនឹងកើតមានឡើងជាយថាហេតុ តាមរយៈ​បទ​ចម្រៀងដែលមានខ្លឹមសារ អុជអាល ញុះញង់នេះ លោកស្រី ស្នើលោកអគ្គស្នងការនគរបាលជាតិ ពិនិត្យចាត់វិធានការនានា តាមនីតិវិធីច្បាប់ ដែលមានជាធរមាន៕