មកដឹងលក្ខខណ្ឌចូលរៀននៅសាលាភូមិន្ទទាំង ៤ នៃរាជបណ្ឌិត្យសភាវិជ្ជាជីវៈតុលាការ

រាជបណ្ឌិត្យសភា​វិជ្ជាជីវៈ​តុលាការ ជា​ថ្នាលបណ្តុះបណ្តាល​ធនធានមនុស្សនៅក្នុង​វិស័យ​អនុវត្ត​ច្បាប់ និង​វិជ្ជាជីវៈតុលាការ​នៅ​កម្ពុជា​។ ទន្ទឹមនេះ រាជបណ្ឌិត្យសភាវិជ្ជាជីវៈ​តុលាការ ក៏ជា​កន្លែង​បណ្តុះបណ្តាល​បឋម ដែលនិស្សិតអាច​ចូល​រៀន​នៅទីនេះ​បាន តាមរយៈ​ការប្រឡងប្រជែង​។ សាលា​​នៅក្រោម​ចំណុះរាជបណ្ឌិត្យសភា​វិជ្ជាជីវៈ​តុលាការមាន​ចំនួន​ ៤គឺ​សាលា​ភូមិន្ទ​ចៅក្រម សាលា​ភូមិន្ទ​ក្រឡាបញ្ជី សាលា​ភូមិន្ទ​សារ​ការី និងសាលា​ភូមិន្ទ​អាជ្ញា​សាលា។

តើមានលក្ខខណ្ឌអ្វីខ្លះ ទើបអាចទទួលបានការបណ្ដុះបណ្ដាលនៅសាលាភូមិន្ទទាំង ៤ នេះ នៃរាជបណ្ឌិត្យសភាវិជ្ជាជីវៈ​តុលាការ?

១/ សាលាភូមិន្ទចៅក្រម

សាលា​ភូមិន្ទ​ចៅក្រម ​ជា​គ្រឹះស្ថាន​សាធារណៈ​រដ្ឋបាលដែលមានកាតព្វកិច្ចជ្រើសរើស និង​បណ្តុះបណ្តាល​វិជ្ជាជីវៈ​ចៅក្រម ការបណ្តុះបណ្តាល​បន្ត និង​វិក្រឹត្យការ​ចៅក្រម និង​ព្រះរាជអាជ្ញា​ ដែលកំ​ពុង​បំពេញការងារនៅ​តាម​សាលា​ជំនះក្តី​។ ដើម្បីអាចចូលរៀននៅសាលាភូមិន្ទចៅក្រម លក្ខខណ្ឌត្រូវបានអនុញ្ញាចំពោះបេក្ខជនទាំងជាមន្ត្រីរាជការ និងនិស្សិត ដែលមានសញ្ជាតិខ្មែរពីកំណើត មានអាយុ ៣៥ឆ្នាំយ៉ាងច្រើនចំពោះបេក្ខជននិស្សិត និងមានអាយុ ៤០ឆ្នាំយ៉ាងច្រើនចំពោះបេក្ខជនមន្ត្រីរាជការ សញ្ញាបត្រកម្រិតបរិញ្ញាបត្រច្បាប់ឡើង ហើយត្រូវឆ្លងកាត់ការប្រលងប្រជែងជាសិស្សចៅក្រម។ ការប្រលងប្រជែងជាសិស្សចៅក្រមមានពីរដំណាក់កាល គឺដំណាក់កាលទី១ វិញ្ញាសាសរសេរ មាន៤មុខវិជ្ជា ក្រមព្រហ្មទណ្ឌ ក្រមនីតិវិធីព្រហ្មទណ្ឌ ក្រមរដ្ឋប្បវេណី និងក្រមនីតិវិធីរដ្ឋប្បវេណី។ ដំណាក់កាលទី២​ គឺវិញ្ញាសាផ្ទាល់មាត់ លើប្រធានបទនីតិរដ្ឋធម្មនុញ្ញ នីតិភូមិបាល និងវប្បធម៌ទូទៅដែលទាក់ទងនឹងវិស័យច្បាប់ និងយុត្តិធម៌។

២/ សាលាភូមិន្ទក្រឡាបញ្ជី

សាលា​ភូមិន្ទ​ក្រឡាបញ្ជី ​ជាគ្រឹះស្ថានបណ្ដុះបណ្ដាលវិជ្ជាជីវៈក្រឡាបញ្ជីដែលជា​មន្ត្រី​របស់​ក្រសួង​យុត្តិធម៌។ ការជ្រើស រើសសិស្សក្រឡាបញ្ជី គឺធ្វើឡើងតាមរយៈការប្រឡងក្នុងចំណោមបេក្ខជនជាមន្ត្រីរាជការ និងនិស្សិត។ លក្ខខណ្ឌនៃការចូលរៀននៅសាលាភូមិន្ទក្រឡាបញ្ជី គឺបេក្ខជនត្រូវមានសញ្ជាតិខ្មែរពីកំណើត មានអាយុ ៣០ឆ្នាំយ៉ាងច្រើនចំពោះបេក្ខជនជានិស្សិត និងមានអាយុ ៣៥ឆ្នាំយ៉ាងច្រើនចំពោះបេក្ខជនជាមន្ត្រីរាជការ ​ហើយមានកម្រិត​វប្បធម៌​បរិញ្ញាបត្ររងផ្នែកនីតិសាស្ត្រ​​។ ការប្រលងប្រជែងជាសិស្សក្រឡាបញ្ជី មានពីរដំណាក់កាល គឺដំណាក់កាលទី១ វិញ្ញាសាសរសេរ មាន ៣មុខវិជ្ជា រួមមាន នីតិព្រហ្មទណ្ឌ នីតិរដ្ឋប្បវេណី និងនីតិរដ្ឋធម្មនុញ្ញ។ ដំណាក់កាលទី២​ គឺវិញ្ញាសាផ្ទាល់មាត់ លើវប្បធម៌ទូទៅ និងជំនាញស្ដាប់ និងកត់ត្រា។  

៣/ សាលាភូមិន្ទសារការី

មន្ត្រីសារការី ជា​មន្ត្រី​សាធារណៈដែល​មាន​មុខងារ​ធ្វើ​លិខិតយថាភូត បញ្ជាក់​អំពី​លក្ខណៈ​ពិតប្រាកដ​ត្រឹមត្រូវ ធានារ៉ាបរង​អំពី​កាលបរិច្ឆេទតម្កល់​រក្សាទុក និង​ចេញ​សេចក្តីចម្លង​យថាភូត​នៃ​លិខិត​ទាំងឡាយ ដែល​ត្រូវតែ​មាន​ការបញ្ជាក់។ មុននឹងក្លាយជាមន្ត្រីសារការី គឺត្រូវឆ្លងកាត់ការបណ្ដុះបណ្ដាលនៅសាលាភូមិន្ទសារការី នៃរាជបណ្ឌិត្យសភាវិជ្ជាជីវៈតុលាការ។ ការបណ្ដុះបណ្ដាលនេះ ត្រូវបានធ្វើឡើងតាមរយៈការប្រលងជ្រើសរើសក្នុងចំណោមបេក្ខជនជាមន្ត្រីរាជការ និងនិស្សិត។ លក្ខខណ្ឌសម្រាប់បេក្ខជន គឺមានសញ្ញាតិខ្មែរ មានអាយុ ៣៥ឆ្នាំចំពោះបេក្ខជនជានិស្សិត អាយុ ៤០ឆ្នាំចំពោះបេក្ខជនជាមន្ត្រីរាជការ ហើយមានកម្រិតវប្បធម៌សញ្ញាបត្របរិញ្ញាបត្រឡើង។

៤/ សាលាភូមិន្ទអាជ្ញាសាលា

ដើម្បី​អាច​ទទួល​ការ​បណ្តុះ​បណ្តាល​នៅ​សាលា​ភូមិន្ទ​អាជ្ញា​សាលា​បាន​ចាំបាច់​ត្រូវ​ឆ្លង​កាត់​ការ​ប្រឡង​ជ្រើសរើស​ជាសិស្ស​អាជ្ញា​សាលាក្នុងចំណោមបេក្ខជនជាមន្ត្រីរាជការ និងនិស្សិត ដែលមាន​​វិញ្ញាសា​ចំនួន​ពីរ គឺទី១ ​វិញ្ញាសា​សរសេរ លើមុខវិជ្ជាចំនួន៣ រួមមាន នីតិរដ្ឋ​ធម្មនុញ្ញ នីតិ​ព្រហ្មទណ្ឌ និង​នីតិរដ្ឋ​ប្បវេណី។ ដោយឡែកទី២ គឺ​វិញ្ញាសា​ផ្ទាល់​មាត់​ ទាក់ទងនឹងនីតិ​ការងារ​ នីតិ​ពាណិជ្ជកម្ម នីតិរដ្ឋបាល ភាសា​បរទេស និង​វប្បធម៌ទូទៅ​ផ្នែក​ច្បាប់៕

ដោយ៖ ធឿន វ៉ាន់សុង