ជំរឿនសេដ្ឋកិច្ចឆ្នាំមុន គ្រោងប្រកាសលទ្ធផលក្នុងខែនេះគឺធ្វើឡើងមុនផែនការ

រាជរដ្ឋាភិបាលកម្ពុជាគ្រោងនឹងប្រកាសលទ្ធផលបឋមជំរឿនសេដ្ឋកិច្ចឆ្នាំ ២០២២ នៅថ្ងៃទី ១៩ ខែមករា ឆ្នាំ២០២៣ ខាងមុខនេះ។

លោក ស្រី ដា អ្នកនាំពាក្យក្រសួងផែនការបានមានប្រសាសន៍នៅព្រឹកថ្ងៃទី ០៧ មករានេះថា ការធ្វើជំរឿនសេដ្ឋកិច្ចឆ្នាំ ២០២២ ក្រសួងផែនការបានប្រើរយៈពេល១ខែគឺចាប់អនុវត្តពីថ្ងៃទី០១ ខែមីនា រហូតដល់ថ្ងៃទី ៣១ ខែមីនាឆ្នាំ២០២២។

លោកបានបន្តទៀតថា ទិន្នន័យជំរឿនសេដ្ឋកិច្ចគឺពិតជាមានសារសំខាន់បំផុត ដែលត្រូវធ្វើមិនអាចខ្វះបាន ដើម្បីឆ្លើយតបសេចក្តីត្រូវការប្រើប្រាស់ទិន្នន័យ សម្រាប់ជាធាតុចូលដ៏សំខាន់ក្នុងការរៀបចំគោលនយោបាយអភិវឌ្ឍន៍សេដ្ឋកិច្ច បរិស្ថាន សង្គម វប្បធម៌ និងសុខុមាលភាពរបស់ប្រជាជនកម្ពុជា និងផ្តល់សូចនាករសម្រាប់ចំណុចដៅនៃគោលដៅអភិវឌ្ឍន៍ប្រកបដោយចីរភាពឆ្នាំ២០១៦-២០៣០។

ផ្អែកលើរបាយការណ៍លទ្ធផលបឋមស្តីពីការស្រង់បញ្ជីអង្គភាពសេដ្ឋកិច្ចនៅតាមរាជធានីខេត្ត ទាំង២៥ បានឱ្យដឹងថា  មានចំនួនអង្គភាពសេដ្ឋកិច្ចសរុប ៧៤៣ ៥៣២ ទីតាំងមូលដ្ឋាន នៅឆ្នាំ២០២១ ក្នុងទូទាំងប្រទេស។

ចំនួនអង្គភាពសេដ្ឋកិច្ចបានកើនទ្បើងប្រមាណ ៤៧% បើធៀបនឹងឆ្នាំ២០១១ នៃជំរឿនសហគ្រាសឆ្នាំ២០១១ហើយបានកើនទ្បើងប្រមាណ ៤៥% បើធៀបនឹងឆ្នាំ២០១៤ ផ្នែកទិន្នន័យអង្កេតចន្លោះជំរឿនសហគ្រាសឆ្នាំ២០១៤។

គួរបញ្ជាក់ថា តាមគម្រោងរាជរដ្ឋាភិបាលគ្រោងនឹងប្រកាសផ្សព្វផ្សាយលទ្ធផលជំរឿនសេដ្ឋកិច្ចឆ្នាំ ២០២២ នៅខែសីហា ឬកញ្ញាឆ្នាំ២០២៣ខាងមុខនេះ៕

អត្ថបទ៖ សំអឿន