ព័ត៌មានជាតិ

អាជ្ញាធរស្រុកស្រីសន្ធរ រៀបចំប្រណាំងទូក ង ចូលរួមអបអរសាទរថ្ងៃជ័យជម្នះ ៧ មករា

បានផុស

២ years មុន

នៅ

ថ្ងៃអាទិត្យ ៨ មករា ២០២៣

ដោយ

រដ្ឋបាលស្រុកស្រីសន្ធរ បានរៀបចំការប្រណាំងទូក ង លក្ខណៈប្រពៃណី ដើម្បីចូលរួមអបអរសាទរ ថ្ងៃជ័យជម្នះ ៧ មករា (១៩៧៩-២០២៣) និងបង្កភាពសប្បាយរីករាយក្រោមម្លប់សុខសន្តិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះសង្ឃ រួមនឹងបងប្អូនប្រជាពលរដ្ឋ ដែលបានចូលរួមពិធីប្រណាំងទូក ង នៅក្នុងឃុំព្រែករំដែង ស្រុកស្រីសន្ធរ បានលើកឡើងថា ពេលប្រទេសជាតិមានសន្តិភាពគ្មានសង្គ្រាម ប្រជាពលរដ្ឋមានសិទ្ធិសេរីភាពដើរហើរយ៉ាងសប្បាយរីករាយ។ ពិធីប្រណាំងទូក ង លក្ខណៈប្រពៃណីនៅពេលនេះ គឺបង្ហាញពីការអភិរក្សប្រពៃណីខ្មែរ និងទំនៀមទម្លាប់ពីការប្រណាំងទូកទាំងខ្នាតអន្តរជាតិ និងខ្នាតវែង។

លោក ស៊ឹម គង់ អភិបាលស្រុកស្រីសន្ធរ បានបញ្ជាក់ដែរថា ការរៀបចំពិធីប្រណាំងទូក ង ពេលនេះ មិនត្រឹមដើម្បីជួយថែរក្សាប្រពៃណី បង្កើតនូវក្ដីស្រឡាញ់ និងទំនាក់ទំនងមិត្តភាពប៉ុណ្ណោះនោះទេ ប៉ុន្តែក៏បានចូលរួមបង្កើនស្មារតីសាមគ្គីភាព យោគយល់ និងអធ្យាស្រ័យគ្នាផងដែរ។

លោកអភិបាលស្រុកបន្ថែមទៀតថា ចំពោះការប្រណាំងទូកពេលនេះ ទោះបីមានការឈ្នះ ចាញ់ គឺជាការប្រកួតមិត្តភាព ប្រកួតអស់ពីសមត្ថភាព ក្នុងស្មារតីទទួលខុសត្រូវខ្ពស់ មិនស្អប់គ្នានោះទេ ពេលប្រទេសជាតិទទួលបានសុខសន្តិភាព និងយកជ័យជម្នះ ៧ មករា ក្រោមការដឹកនាំរបស់សម្ដេចតេជោ ហ៊ុន សែន។

សូមជម្រាបជូនដែរថា ទូក ង ដែលបានយកមកប្រណាំងកាលពីថ្ងៃទី ៧ ខែមករានេះ មានចំនួន ៤៥ ទូក ស្មើនឹង ២២ គូ ដោយមានការចូលរួមពីតាមបណ្ដាខេត្ត ដូចជា ខេត្តកណ្ដាល ខេត្តព្រៃវែង និងតាមបណ្ដាស្រុក នៃខេត្តកំពង់ចាមផងដែរ៕

អត្ថបទ និងរូបភាព ៖ ឡេក ចាន់ពេជ្រ