ជនរងគ្រោះ​ត្រូវពឹង​អ្វី​? បើ​នគរបាល​មិនអាច​បើក​ការស៊ើបអង្កេត​បាន​ ករណី​មន្ត្រី​ជលផល វាយ​ពលរដ្ឋ​របួសធ្ងន់​

លោក ភី ឆុន អធិការនគរបាល​ស្រុកសំរោង បានបញ្ជាក់ជាថ្មីនៅ​ព្រឹកថ្ងៃទី​៩ ខែ​មករា ឆ្នាំ​២០២១​នេះ​ថា ករណី​ចោទប្រកាន់មន្ត្រីជលផល​ថា​ បាន​វាយដំប្រជាពលរដ្ឋម្នាក់ បណ្តាលឲ្យរបួសធ្ងន់​ស្ទើរស្លាប់​ នៅ​ចំណុច​កោះ​អញ្ចាញ​នោះ សមត្ថកិច្ចនគរបាលមិនអាចបើក​ការស៊ើបអង្កេត​បានទេ​។​

​តាម​លោក ភី ឆុន ថា ករណីនេះ​លោកបានសុំយោបល់ទៅកាន់​ថ្នាក់លើ​របស់​លោក គឺ​លោក ហ៊ិ​ន សុខ​ផេង ដែល​ជាស្នងការរងទទួល​ផែន​ព្រហ្មទណ្ឌ ហើយ​ថ្នាក់លើបានបញ្ជាក់មកលោក​ថា សំណុំ​រឿង​នេះ គឺ​មន្ត្រី​ជលផល​ជាអ្នកកសាងសំណុំរឿងខ្លួនគេ ព្រោះថា មន្ត្រីជលផល ក៏ជា មន្ត្រីនគរបាលយុត្តិធម៌​ដែរ ដូច្នេះសមត្ថកិច្ចរបស់លោកមិនអាចលូកដៃ​ចូល​បានទេ​។ ចំពោះការ លើកឡើង​នេះ បានធ្វើឲ្យក្រុមគ្រួសារជនរងគ្រោះ បង្ហាញអារម្មណ៍​អស់សង្ឃឹមយ៉ាង​ខ្លាំង ព្រោះ ថា ករណីនេះ​បាន​បង្ក​ឡើង​ ដោយមន្ត្រីជលផល ហើយឥឡូវមន្ត្រីជលផលបែរជា​ធ្វើការ​ស៊ើបអង្កេត​ខ្លួនឯង​ទៅវិញ តើនឹងមានយុត្តិធម៌​ដែរឬទេ​?

​សូមបញ្ជាក់ថា ករណី​ហិង្សា ដែលត្រូវចោទប្រកាន់ថា បាន​ប្រព្រឹត្តដោយមន្ត្រីជលផល​នេះ បាន កើតឡើង​កាលពី​យប់​ថ្ងៃទី​៦ ខែមករា ដោយមាន នរងគ្រោះ​ឈ្មោះ ភឹម វី អាយុ៤០​ឆ្នាំ រស់នៅ ភូមិ​ព្រៃ​ផ្គាំ​(​គ​) ស្រុក​អង្គរបុរី ខេត្ត​តាកែវ​។​

អត្ថបទ៖ វីរៈ

សូមចុចអាន៖ ​មិន​ចប់ត្រឹមហ្នឹង​ទេ! អធិការ​​រង់ចាំពាក្យ​បណ្តឹង​ ករណី​ហិង្សា​លើ​ជនរងគ្រោះរហូត​ដល់​ដេកពេទ្យ