ជំនន់ទឹកភ្លៀងហូរផ្ដាច់ទំនប់ និងស្ពានចូលតំបន់ទេសចរណ៍ធម្មជាតិទឹកធ្លាក់ថ្មក្រាល អាជ្ញាធរប្រកាសផ្អាកការធ្វើដំណើរបណ្ដោះអាសន្ន

រដ្ឋបាលស្រុកទឹកផុស បានចេញលិខិតជូនដំណឹងស្ដីពីការផ្អាកធ្វើដំណើរកំសាន្តទៅកាន់តំបន់ទេសចរណ៍ធម្មជាតិទឹកធ្លាក់ថ្មក្រាល ស្ថិតនៅភូមិកោះខ្ទុម្ព ឃុំជៀប ស្រុកទឹកផុស ខេត្តកំពង់ឆ្នាំង បន្ទាប់ពីជំនន់ទឹកភ្លៀងបានហូរផ្ដាច់បាក់ទំនប់កោះភ្នៅ (ទំនប់ចាក់ទឹម) និងដាច់ស្ពានអូរឃ្លៃទាំងស្រុង។

យោងតាមសេចក្ដីជូនដំណឹងរបស់រដ្ឋបាលស្រុកទឹកផុស ដែលបានជូនដំណឹងនៅព្រឹកថ្ងៃទី១២ ខែមករា នេះថា កាលពីវេលាម៉ោង៤ទៀបភ្លឺ ថ្ងៃទី១២ ខែមករា ឆ្នាំ២០២៣ មានភ្លៀងធ្លាក់យ៉ាងខ្លាំងទឹកជំនន់ឡើងខ្ពស់ បណ្ដាលឲ្យបាក់ទំនប់​កោះភ្នៅ (ទំនប់ចាក់ទឹម) ផ្លូវចូលទៅកាន់តំបន់រមណីយដ្ឋានធម្មជាតិទឹកធ្លាក់ថ្មក្រាល និងបណ្ដាលឲ្យដាច់ស្ពានអូរឃ្លៃទាំងស្រុង ស្ថិតនៅភូមិកោះខ្ទុម្ព ឃុំជៀប ស្រុកទឹកផុស។

ដើម្បីរក្សាសុខសុវត្ថិភាពប្រជាពលរដ្ឋ និងភ្ញៀវទេសចរ រដ្ឋបាលស្រុកទឹកផុស បានផ្អាកជាបណ្ដោះអាសន្ននូវដំណើរកំសាន្ត​ទឹកធ្លាក់ថ្មក្រាល ចាប់ពីថ្ងៃទី១២ ខែមករា ឆ្នាំ២០២៣ រហូតដល់ជូនដំណឹងសារជាថ្មី៕